Йәшлек – йәшнәр саҡ28.10.2015
Йәшлек – йәшнәр саҡ “Йәштәр – башҡорт халҡының стратегик ресурсы” тигән төбәк-ара ғилми-ғәмәли конференцияның уҙыуы осраҡлы түгел. Башҡортостан Башлығы Рөстәм Хәмитов октябрь уртаһында йәш депутаттарҙың беренсе форумында, йәшлек менән алдырырға тейешһегеҙ, тигән һүҙҙәргә тиккә генә баҫым яһаманы.
Йәштәр һарайына килеп ингән һәр кем ҡунаҡсыл мөхиткә эләкте: “Баш­ҡорт энциклопедияһы” ғилми-нәшриәт комплексы, З. Биишева исемендәге Башҡортостан “Китап” нәшриәте, Өфө ғилми үҙәгенең Тарих, тел һәм әҙәбиәт институты китап менән сауҙа итә, Әлфиә менән Гөлфиә Хамматовалар милли кейемдәр күргәҙмәһе ойоштор­ған ине. Унда ла, бында ла өйкөм-өйкөм йыйылған фекерҙәштәрҙең, дуҫтарҙың һөйләшеп һүҙҙәре бөтмәне.
Башҡортостан Башлығы хакимиәте­нең ижтимағи-сәйәси үҫеш идаралығы начальнигы урынбаҫары Ришат Саби­товтың һүҙҙәренә ҡарағанда, әлеге фо­румға төрлө тарафтарҙан башҡорт йәш­тәренең иң әүҙемдәре ашҡынып ки­леп еткән. Ҡыҙҙарҙың һәм егеттәрҙең йәмәғәтселеккә, халҡына еткерер тәҡ­дим­дәре күп йыйылған, барыһы ла яңы идея менән яна, тәжрибә уртаҡлашырға әҙер.
Ришат Хажиғәле улының сығышын “Башҡорт йәштәре, алға!” тип тамамла­уы оло мәғәнәгә эйә ине.
– Башҡортостан – башҡорттарҙың мәнфәғәтен ҡайғыртҡан берҙән-бер тө­бәк, ә инде йәштәр менән ҡулға-ҡул тото­ноп эшләү – киләсәктең яҡты бу­лы­ры­на бер ышаныс, – тип башланы һү­ҙен Бөтә донъя башҡорттары ҡо­рол­тайы Башҡарма комитеты рәйе­сенең беренсе урынбаҫары Хәләф Ишморатов. – Тормош ҙур тиҙлектә үҙ­гә­реүсән, ә йәш быуын насар ғәҙәт­тәргә тиҙ би­решеүсән. Көнбайыштан көсләп та­ғыл­ан идеологияға – эскелек­те, нар­ко­ма­нияны, бер енесле никах­тар­ҙы, компьютерға бәйлелекте про­паган­далауға ҡаршы торорға кәрәк. Йәштән үк илһөйәрлек тойғоһон тәр­биәләүҙе күҙ уңынан ысҡындырырға ярамай.
Хәләф Хәлфетдин улы мәғариф системаһында алып барылған ҡулай­лаштырыу процесына, ауылдарҙа фельд­шер-акушерлыҡ пункттарының ябылыуына, милләттәштеребеҙҙең сит­кә китеп эшләүенә тәрән борсолоуын белдерҙе. Ә бына милли үҙаңға бәйле сараларҙың яҡшы ойошторолоуын тел­гә алды. Йәрмәкәй, Дыуан, Яңауыл, Асҡын, Тәтешле, Илеш райондарын, Пермь крайын миҫал итеп килтереп, шәжәрә байрамдарын баш­ҡорт­тарҙан күрмәксе бүтән халыҡ­тарҙың да уҙғарыуын әйтеп үтте.
Төштән һуң конференция эше төрлө секцияларҙа дауам итте.



Вернуться назад