Хеҙмәттең төбө – хәрәкәт, күптең төбө – бәрәкәт тигән халыҡ мәҡәле, әйтерһең дә, булдыҡлы Хәлим ағайға ғына төбәлгән кеүек. Ҡасан ғына булмаһын, иҡтисади көрсөктә лә, бүтән һынауҙар алдында ла һис кенә лә юғалып ҡалманы. Унан йәштәргә биргеһеҙ дәрт бөркөлә, хеҙмәтте яратыуы, һөнәренә һөйөү менән ҡарауы тураһында әйтеп тороу артыҡ.
– Элекке менән хәҙерге тормошто сағыштырып ҡарайым да әле Хөкүмәттең ярҙамына һөйөнөп бөтә алмайым, – тип һөйләй Ейәнсура районының “Импульс” асыҡ акционерҙар йәмғиәте директоры Хәлим Ҡарағужин. – Малды ишәйтеү өсөн шарттар тыуҙырылған – иркенлек, үҫемлекселек тармағын алып барырға теләүселәргә лә юл асыҡ, ташламалы ссудалар бирелә.
Шул иғтибарға лайыҡ: “Импульс” – районда табышлы эшләүсе берҙән-бер хужалыҡ. Ул малсылыҡ буйынса махсуслашҡан. Күпләп һыйыр малы аҫрауҙың отошло яҡтарын аңлаған етәкселек. Өс йөҙ башҡа яҡын һауын һыйыры – улар өсөн сик түгел, әлбиттә. Киләсәктә мал һанын тағы ла арттырмаҡсылар.
Хәлим Ғәләүетдин улының һүҙҙәренә ҡарағанда, һөт һатыу менән шөғөлләнеү – табышлы йүнәлештәрҙең береһе. Йәмғиәт Мәләүез һөт комбинатына (үҙҙәре килеп ала) тәүлегенә бер тонна 200 центнер һөт тапшыра. Халыҡтан да һөт йыйыу ойошторолған. Заманса һыуытҡыстары бар, йәнә берәүҙе алмаҡсылар. “Был йәһәттән етештереүҙе юлға һалырға уйламайһығыҙмы?” – тип һораным. Ейәнсура районына иң яҡын ҡалалар – Мәләүез менән Сибай, уларына ла – 200 саҡрым. Продукцияны һатыу мәшәҡәтле икән, ә һөт ризыҡтарын район үҙәге Иҫәнғолда ғына һатып бөтөү мөмкин түгел.
Директор энергетик Әсхәт Мөфтәхетдинов, баш инженер Фуат Күсәрбаев, быҙау ҡараусы Нәркәс Йәнбирҙина, һауынсы Зәйнәб Ғайсароваларҙы маҡтап телгә алды. Таҙлар ауылы һылыуы Гүзәл Дүшәнбаева, былтыр Башҡортостан дәүләт аграр университетын тамамлағас, тыуған яҡтарына юллана һәм мал табибы булып эшкә тотона. Хужалыҡҡа юллама нигеҙендә эшкә урынлашҡас, Хөкүмәт йәш белгескә 100 мең һум “подъемный” биргән, бынан тыш, үҙе белем алған уҡыу йорто биш йыл буйы ете мең һум аҡса түләй, өҫтәүенә, эш хаҡы ла ала.
Хәлим Ғәләүетдин улын осратыусылар унан орден хаҡында төпсөнә. Ниндәй орден, ни өсөн бирелгән? Мин дә был турала ҡыҙыҡһындым. Баҡтиһәң, Бөтә Рәсәй “Бизнес-рейтинг” ойошмаһы 2011 йылғы эш йомғаҡтары буйынса “Импульс”ты бындай бүләккә лайыҡлы тип тапҡан. Унда тотош ил буйынса 646 мең тирәһе йәмғиәт ҡатнашҡан, ә хужалыҡ – 50-се баҫҡыста. “Йыл эшҡыуары” тигән сертификатҡа ҡушып етәксегә орден да бирелде.