“Ирәмәл” тәбиғәт паркы биләмәһендә “Урал батыр” башҡорт халыҡ эпосы буйынса экологик-туристик маршрут асыла.

Республиканың Тәбиғәттән файҙа­ланыу һәм экология министрлығынан хәбәр итеүҙәренсә, туристик һуҡмаҡтың оҙонлоғо 28 саҡрым тәшкил итәсәк. Әле унда ете тематик туҡталҡа билдә­лән­гән. Тиҙҙән Урал батырҙың һәм эпостың бүтән геройҙарының ағас һындары барлыҡҡа киләсәк.
Парк хакимиәтендә әйтеүҙәренсә, яңы маршрут асылғас, туристар һаны яҡынса 10 меңгә артасаҡ тип күҙалла­на.
Республикабыҙға килгән проектты финанслаған Рус география йәмғиә­тенең вәкиле Александр Хацкевич та тәбиғәт паркының үҫешенә юғары баһа бирҙе.
– Йәмғиәт гранты иҫәбенә бик әһә­миәтле һәм күләмле эш тормошҡа ашырыла. Республикаға сәфәрҙән тик ыңғай тәьҫораттар ғына ҡалды, – тине ул.