Дәүләт Йыйылышы — Ҡоролтай Рәйесе Константин Толкачев Закон сығарыусылар советының милли именлекте ҡанундар менән тәьмин итеү һәм коррупцияға ҡаршы эшмәкәрлек мәсьәләләре буйынса ултырышын үткәрҙе.

Унда ришүәтселеккә ҡаршы ҡану­ниәт­те үҫтереү йүнәлештәре тикшерел­де. Константин Толкачев билдәләүенсә, әле Рәсәйҙәге коррупцияға ҡаршы закондар һөҙөмтәле булһа ла, ижтимағи мөнәсәбәттәр кимәлен иҫәпкә алып, уларҙы даими камиллаштырырға кәрәк.
— Хоҡуҡи йүнәлештә ҡайһы бер күрһәткестәр буйынса беҙ күп кенә илдәрҙән алда барабыҙ. Ғәмәлдәге норматив-хоҡуҡи базаны үҫтереү дауам итә. Быйыл ғына ришүәтселеккә ҡаршы эш итеү өлкәһендәге хоҡуҡ акттарына төҙәтмәләр индереүҙе күҙ уңында тотҡан бер нисә федераль закон ҡабул ителде, — тине республика парламенты етәксеһе.
Константин Толкачев әйтеүенсә, Башҡортостан Дәүләт Йыйылышы — Ҡоролтай ҡануниәт үҫешенә тос өлөш индерә. Ошо көндәрҙә Дәүләт Думаһы беҙҙең парламент тәҡдим иткән “Кор­рупцияға ҡаршы эш итеү тураһында”ғы Федераль закондың 125-се статьяһына үҙгәреш индереү хаҡында”ғы закон проектын тикшереп, беренсе уҡыуҙа ҡабул итте.