Бәлки, мәғлүмәт саралары өсөн улар заман геройҙары түгелдер. Образдары телеэкрандарҙа йыш ялтламай, фоторәсемдәре ялтыр тышлы журналдарҙы биҙәмәй, виртуаль донъяның яңылыҡтар теҙмәһендә исемдәре беренсе урында түгел... Әммә улар беҙҙең арала, ә көндәлек хеҙмәттәре – күҙгә күренмәгән алыштың алғы һыҙығында. Улар – рухиәт һаҡсылары, ил именлеге менән тел именлеген яҡлаусылар, милләттең нигеҙе... Улар – мәғариф, мәҙәниәт, киң мәғлүмәт саралары хеҙмәткәрҙәре.

Кисә баш ҡала хакимиәтендә алдынғы уҡы­тыусыларҙы, китапханасыларҙы, журна­лис­тарҙы тәбрикләнеләр. Дәүләт телдәрен һәм туған телдәрҙе үҫтереүгә һәм пропа­гандалауға ҙур өлөш индергәне өсөн Өфө ҡала хакимиәте башлығының йыллыҡ пре­мияһын алыусы­ларҙың береһе – “Башҡор­тос­тан” гәзитенең әҙәбиәт һәм мәҙәниәт бүлеге етәксеһе Лариса Абдуллина. Ул: “Был бүләк минең шәхси ҡаҙа­нышым ғына түгел, ә тотош редакциябыҙҙың хеҙмәте”, – тип билдәләне. Моғайын, лауреат­тарҙың һәр береһе үҙ коллективы хаҡында шулай тип әйтә алалыр.