Республика көнө алдынан баш ҡалала “Башҡортостан — дуҫтар күҙлегенән” фотокүргәҙмәһе асылды. “Башҡортостан” дәүләт концерт залындағы был сара республикабыҙҙа июнь айында ШОС һәм БРИКС илдәренең фотохәбәрселәре ҡатнашлығында уҙғарылған “Тәбиғәт. Кеше. Мәҙәниәт” ХХV Халыҡ-ара акцияһының дауамын тәшкил итә.
— Төбәгебеҙ буйлап фотосәйәхәт­тәр­гә үҙенсәлекле йомғаҡ яһау, күргәҙмәләр, ижади кисәләр ойоштороу яҡшы йолаға әүерелде, — тине акцияны ойоштороусы, респуб­ли­каның Фоторәссамдар союзы рәйесе Рәмил Килмә­мә­тов. — Проектта ҡатнашыусылар ошо рәүешле үҙҙәренең ватандаштарын Рәсәйҙең иң ғәжәйеп гүзәл төбәге – Баш­ҡортостан менән таныштыра. Бындай күргәҙмәләр рес­пуб­ликабыҙҙың башҡа ҡала, район­дарында ла уҙғарыла.
Күптән түгел Бишбүләк районында “Ағи­ҙел” республика фотоклубы һәм Рәсәй Фоторәссамдар союзының Баш­ҡортостан бүлексәһе ағзалары ҡатнаш­лығында ижади кисә үтте. Был көндә район мәҙәниәт йортонда “Бишбүләк — шишмәләр иле” күргәҙмәһе асылды.