Кермәһә лә улар ут эсенә,
Йотто күрҙе, ҡайғы-хәсрәт йотто.
Баҫыу-ҡырҙар булды яу яланы,
Ҡорал итеп улар һабан тотто.

Ашлыҡ урҙы, ләкин аслыҡ һурҙы.
Яҙғанда ла һуңғы телеменән,
Кешелектең киләсәге өсөн
Бүлештеләр тыуған иле менән.

Уйҙарында уйын түгел ине
Балаларҙың, уйын арбаһа ла, –
Арыҡ иңдәренә ҡамыт кейеп,
Егелделәр илдең арбаһына.

Шахталарҙа, завод-фабрикала,
Баҫыу-ҡырҙа түкте улар көсөн:
Бөтәһе лә фронт өсөн булды,
Бөтәһе лә булды Еңеү өсөн!