Өфөлә “Заманса Рәсәйҙә федерализм: дөйөм милли дәүләт менән Федерация субъекттары араһындағы үҙ-ара мөнәсәбәттәр” фәнни-ғәмәли конференцияһы уҙҙы. Унда Дәүләт Йыйылышы — Ҡоролтай Рәйесе, юридик фәндәр докторы Константин Толкачев илебеҙҙәге федерализм сығанағының Башҡортостанда булыуы хаҡында һүҙ алып барҙы. Республика көнөнә арналған конференцияға юристар, политологтар, иҡтисадсылар йыйылды.

– Башҡортостанды дәүләт ҡороло­шоноң федератив моделен төҙөүҙә иң әүҙем ҡатнашҡан төбәктәр иҫә­бенә индерергә мөмкин. Ул — автономиялы республика дәрәжәһендә үҙәк власты таныған тәүге субъект. Был ҙур әһә­миәткә эйә, сөнки Рәсәй дәүләтенең федератив үҫеше тап беҙҙә башланды, — тине Константин Толкачев. Уның бил­дәләүенсә, был ресурсты әле лә фай­ҙаланырға мөмкин, сөнки вәкәләттәр Федераль үҙәктән республика кимәленә даими тапшырыла килә. Үҙенең сығы­шында Константин Толкачев Дәүләт Йыйылышы — Ҡоролтайҙың Рәсәйҙәге федерализм үҫешенә йоғонтоһо ха­ҡында ла һөйләне.
Конференция барышында Башҡорт­остандың Фәндәр академияһы, юғары уҡыу йорттары вәкилдәре һәм эксперттар үҙәк менән төбәктәр араһындағы мөнәсәбәттәрҙе, ошо йәһәттән республика тәжрибәһен тикшерҙе. Заманса Рә­сәй федерализмының сәйәси һәм иҡ­ти­сади үҙенсәлектәре лә ҙур ҡыҙыҡ­һыныу тыуҙырҙы.
Башҡортостан дәүләт хеҙмәте һәм идара итеү академияһы ректоры, тарих фәндәре кандидаты, профессор Сергей Лаврентьев әйтеүенсә, әле башҡа­рыл­ған эшкә йомғаҡ яһау, киләсәккә маҡсаттар билдәләү өсөн ҡулай мәл. Сарала ҡатнашыусылар тарихи ваҡиғаларҙы хәтергә төшөрөп, һығымта яһаны һәм киләсәккә фараздар ҡылды.