Башҡортостанда иппотерапия һәм ат спорты әүҙем үҫешә. “Аҡбуҙат” ипподромы майҙансығында “Милләт йәшлеге” төбәк йәмәғәт фонды ойошторған “түңәрәк өҫтәл” барышында иппотерапияға арналған тәүге фильм менән таныштырыу сараһы булды, “Һаулыҡ һорап — ат янына” хәйриә проектына йомғаҡ яһалды.


– Беҙ инвалидтарҙың проблемаларын республика власть органдары, бөтөн йәмәғәт­се­лек кимәлендә күтәрҙек. Иппотерапияны үҫтереү мәсьәләһенә иғтибарҙы йәлеп иттек. Инвалид балаларҙы реабилитациялауға йүнәлтелгән “Һаулыҡ һорап — ат янына” проекты мотлаҡ дауам итәсәк, сөнки “Милләт йәшлеге” етәкселеге программаны киләһе йылда ла тормошҡа ашырыу өсөн мөмкинлек таба алды, — тине фонд президенты Рима Баталова.