Бөгөн Башҡортостанда “Театр төнө” уҙғарыла. Мәҙәни акция театрҙар алдындағы майҙансыҡтарҙа киске сәғәт 6-ла башлана.

Мәжит Ғафури исемендәге Башҡорт дәүләт академия драма театры янында әкиәт геройҙары кескәй тамашасыларын көтә. Өфө “Нур” татар дәүләт театры алдында иһә “Театр йондоҙҙары парады” үткәрелә. Бинаның эсендә симфоник музыка уйнаясаҡ, ысын карнавал ойоштороласаҡ. Ә Башҡорт дәүләт ҡурсаҡ театрында ҡурсаҡтарҙы йөрөтөү оҫталығын, опера һәм балет театрында грим һалыу нигеҙҙәрен үҙләштерергә мөмкин. Урыҫ дәүләт драма һәм М. Кәрим исемендәге Милли йәштәр театрҙары сәхнәләрендә күңелле тамаша көтөлә.
Теләге булған һәр кеше, бер аҙға ысын актерға әйләнеп, сараларҙа ҡатнаша ала. Был кис шулай уҡ сәхнә оҫталары, режиссерҙар оҫталыҡ дәресе, буласаҡ спектаклдәрҙең асыҡ репетицияларын үткәрә.