Башҡортостан Хөкүмәте быйыл еңел сәнәғәт предприятиеларына Рәсәйҙә теркәлгән етештереүселәрҙән сеймал, материалдар һәм ярымфабрикаттар һатып алыуға сығымдың бер өлөшөн ҡаплау өсөн республика ҡаҙнаһынан субсидия биреү тәртибен раҫланы.
Бындай дәүләт ярҙамы 2013 йылда ойош­торолғайны, финанслау күләме 30 миллион һум тәшкил итте. Былтыр иһә 29,3 миллион һумлыҡ субсидия бүленде. Быйыл уның өлөшө Рәсәйҙә етештерелгән сеймалды һатып алыуға сығымдың 25 процентын һәм республикала сығарылған сеймалға сығым­дың 50 процентын тәшкил итеүе ихтимал. Ярҙамға ҙур предприятиелар ҙа, шәхси эш­ҡыуарҙар ҙа иҫәп тота ала.