Быйылғы кәңәшмә яңы асылған “Sheraton” отелендә уҙҙы, уның барышын мәктәптәрҙә онлайн-режимда ҡа­рау мөмкинлеге лә булды. “Мәктәпкәсә, дөйөм һәм өҫ­тәмә белем биреүҙең интеграцияһы” тип аталған был сарала Башҡортостан Хөкүмәте Премьер-министры урынбаҫары Салауат Сәғитов, республиканың мәғариф министры Әлфис Ғаязов, Юғары уҡыу йорттары рек­тор­ҙары советы рәйесе Раил Әсәҙуллин, мәғариф ида­ра­лығы, уҡытыу ойошмалары вәкилдәре, педагогик ­хеҙмәт ветерандары, ата-әсәләр йәмғиәте ағзалары ҡатнашты.
Республиканың дәүләт сәйәсәтен тормошҡа ашырыу сифатлы белем биреүҙе ныҡлы ойоштороуға ла йү­нәл­телгән. Һандар теле менән әйткәндә, Өфө ҡала­һындағы балалар баҡсаларына 55 мең бала йөрөй. Урын мәсьәләһе көн ҡаҙағына һуҡмай тиерлек. Әле Дим, Октябрь, Калинин райондарында биш яңы балалар баҡ­са­һы төҙөлә. Дөйөм белем биреү системаһында 130 ойошма иҫәпләнә, уларҙа 100 меңдән ашыу бала уҡый. 2015 йылда 95 мәғариф ойошмаһына капиталь ремонт эшләнгән. Учреждениеларҙың 78,5 процентында – инеү­ҙе күҙәтеү системаһы, 81 процентында видео­күҙәтеү көйләнгән. Һәр белем усағы юғары тиҙлекле Интернет, электрон китаптар, программалар, аңды үҫтереүсе уйындар тупланмаһы менән тәьмин ителгән. “Бер уҡыусыға – бер компьютер” принцибы буйынса йыһазландырылған мобиль һәм предмет кабинеттары булдырыла. Белем алыу процесында уҡыусылар шәхси электрон ҡорамалдарын да ҡуллана аласаҡ.
Август кәңәшмәһе барышында, атап үтелгән мәғлү­мәттәрҙән тыш, юғары уҡыу йорттарының белем биреү кимәле, ундағы уҡытыусыларҙың һөнәри оҫталығы ха­ҡында ла телгә алынды. Атап әйткәндә, Өфө дәүләт авиация техник университеты ҡарамағындағы 153-сө ли­цейҙың алдынғы һөҙөмтәләре миҫалында фекерҙәр яңғыраны, һәр юғары уҡыу йортоноң билдәле бер мәктәп менән тығыҙ бәйләнештә тороуы мөһим тигән теләк-тәҡдимдәр ҙә булды.
Хөкүмәт Премьер-министры урынбаҫары Салауат Сәғитов үҙ сығышында: “Өфөнөкө булыу ғына яҡшыраҡ икәнлекте аңлатмай, баш ҡалала ла үҙ етешһеҙлектәре осрап тора,” – тип белдерҙе. Салауат Тәлғәт улы баш ҡала уҡытыусыларын камиллыҡҡа, юғары һөҙөмтәләргә ынтылырға саҡырҙы, сөнки тап уларҙан район, ауыл мәктәптәрендәге мәғариф хеҙмәткәрҙәре өлгө ала.
Ҡаланың мәғариф системаһындағы кадрҙар мәсьә­ләһенә килгәндә, быйыл Өфөләге белем усаҡтарына былтырғыға ҡарағанда 30-ға күберәк, йәғни йәмғеһе 192 йәш белгес эшкә килгән. Баш ҡала хакимиәтенең мәғариф идаралығы етәксеһе Елена Хаффазова һүҙ­ҙә­ренсә, заманса белем биреүҙе ойоштороу өсөн барлыҡ шарттар ҙа булдырылған, ә төп маҡсат – әлегәсә өлгәшелгән һөҙөмтәләрҙе тағы арттырыу.
Кәңәшмәлә уҡытыу процесын ойоштороу, эшмә­кәр­лекте камиллаштырыу, яңылыҡтарҙы үҙләштереү мәсьә­ләләре хаҡында һөйләшеүҙән һуң мәктәп-гим­на­зияларҙың алдынғы уҡытыусыларын тәбрикләү тан­танаһы уҙҙы. Ә телгә алынған тәҡдим-кәңәштәр белем усаҡтарына таратылып, артабанғы эшмәкәрлектә ҡулланыласаҡ.