Өфөләге «Аҡбуҙат» ипподромында умартасыларҙың күргәҙмә-йәрминкәһе асылды. Баш ҡала халҡына һәм ҡунаҡтарға был майҙанда балдың 200-гә яҡын төрө тәҡдим ителә.– Йәрминкәлә Нуриман, Архангел һәм Иглин райондары умартасылары бик әүҙем ҡатнаша. Йүкә, сәскә балдарының төрлө төрөн килтергәндәр. Маҡсатыбыҙ — ҡала халҡын умартасылар, улар етештергән продукция менән яҡшыраҡ таныштырыу, — тине Башҡортостандың Умартасылыҡ һәм апитерапия буйынса ғилми-тикшеренеү үҙәге директоры Әмир Ишемғолов. Уның һүҙҙәренсә, ошондай күләмдәге бал продукцияһы ҡуйылған күргәҙмәләр донъяның башҡа бер илендә лә юҡ.
– Шуға ла республикабыҙҙы фән һәм технологиялар үҫешкән төбәк тип ғорурлыҡ менән атай алабыҙ. Тәҡдим ителгән тауарҙар араһында балдан яһалған 50-нән ашыу косметика продукцияһы, прополислы һыу, өҫтәмәләр һалынған балдың 75 төрө бар, — тип билдәләне Әмир Ишемғолов.
Күргәҙмә-йәрминкәне Халыҡ-ара умартасылыҡ ассоциациялары федерацияһы президенты Жиль Ратиа ла ҡараны. Ул Башҡортостанға умартасылыҡтың бөгөнгө проблемаларына арналған “түңәрәк өҫтәл”дә ҡатнашыу, Бөрйән һәм Ауырғазы райондарында балдан төрлө продукция етештереүсе предприятиеларҙың эше менән танышыу өсөн килгән.
Жиль РАТИА, Халыҡ-ара умартасылыҡ ассоциациялары федерацияһы президенты: — Сараны ойошторғанығыҙ һәм мине төбәккә саҡырғанығыҙ өсөн рәхмәтлемен. Башҡа илдәр менән умартасылыҡ өлкәһендә хеҙмәттәшлек итеү йәһәтенән Башҡортостанды яңы кимәлгә сығарыуға, республикалағы бал продукттарын халыҡ-ара баҙарҙа танытыуға тырышлыҡ һаласаҡмын. Һеҙҙә сифатҡа бәйле хәл бик яҡшы, шуға күрә күргәҙмәләрҙә таныштырғандан һуң төбәктәге продукцияға донъя баҙарҙарына юл киңәйәсәк, тип иҫәпләйем.