Башҡорт шәле һоҡландырҙы26.08.2015
Калининградта уҙғарылған “Тыныслыҡ биләмәһе” IV халыҡ-ара фестивалендә башҡорт шәлдәре күрһәтелде. Сара барышында ойошторолған был халыҡ ижады йәрминкәһендә Белоруссия, Литва, Польша, Украина, Франция илдәренән, Рәсәйҙең 13 төбәгенән оҫталар ҡатнашты.
Унда республика намыҫын яҡташыбыҙ Алһыу Әбсәләмова яҡланы. Шәл бәйләү оҫтаһы Башҡортостан райондарында ошо кәсепте үҙ иткән күп эшҡыуарҙар менән бәйләнеш тота. Әбсәләмовтар ғаиләһенең фермер хужалығы бар, унда йөн һәм кәзә мамығын эшкәртеү менән шөғөлләнәләр.
— Калининградтағы байрам юғары кимәлдә ойошторолдо, — ти Алһыу Ғәббәс ҡыҙы. — Башҡорт шәленә һоҡланып туйманылар. Минеңсә, был фестивалгә ғаилә менән барыу, балаларҙы илебеҙҙең, башҡа дәүләттәрҙең мәҙәниәте менән таныштырыу зарур. Тыныслыҡҡа, татыулыҡҡа ынтылған кешеләрҙе тап халыҡ ижады берләштерә.