Рөстәм Хәмитов Республика йортонда “Рәсәй ауыл хужалығы академияһының Бөтә Рәсәй кукуруз ғилми-тикшеренеү институты директоры Владимир Сотченко менән кәңәшмә үткәрҙе. Унда шулай уҡ Башҡортостан Хөкүмәте ағзалары, муниципалитет башлыҡтары, агросәнәғәт комплексының алдынғы предприятиелары етәкселәре ҡатнашты.
— Бөгөнгө һөйләшеүҙең те­маһы — республикала кукуруз үҫтереү. Ошо мәсьәләгә бәйле һеҙҙән тәҡдимдәр көтәбеҙ, — тип һүҙен башланы Башҡортостан Башлығы. — Һуңғы тиҫтә йылда был культураны етештереүгә бәйле хәл шәптән түгел. Әүәлерәк ул 200 мең гектарҙан ашыу ерҙә үҫтерелһә, әле ни бары 40 мең гектарҙа. Ауыл хужалығы министр­лығы кукуруз майҙанын 80 мең гектарға еткереүгә өлгәш­те. Ләкин был ғына етмәй. Күрше Татарстанда күрһәткес — 220-230 мең гектар.
Василий Сотченко әйтеүенсә, Рәсәйҙә 4 миллион гектар ерҙә кукуруз үҫтерелә. Уның 2,5 миллион гектары — иген, 1,54 миллионы силос кукурузына тура килә. Һуңғы йылдарҙа иген кукурузын етештереү илебеҙҙә 2,5 тапҡырға артҡан.
— Һеҙҙә ер Татарстанға ҡарағанда сифат­лыраҡ. Өфө, Ҡырмыҫҡалы райондарындағы ҡара тупраҡты башҡа төбәктәрҙә осрат­маҫһың да, — тине Владимир Сотченко. — Ҡошсолоҡ фабрика­лары­ның ҡал­дыҡтары кеүек ашлама базаһы ла тап ошо йүнәлеште үҫтереүгә булышлыҡ итәсәк.
Республика Башлығы кукуруз ғилми-тикшеренеү институты менән хеҙмәттәшлек тураһын­дағы килешеү төҙөргә тәҡдим итте. Яҡтар быйыл октябрҙә үткәреләсәк семинар барышында был документҡа ҡул ҡуйырға килеште. Бынан тыш, ғилми-тикшеренеү институты Стәрлета­маҡ һәм Ауырғазы райондарында кукуруз сәсергә һәм уңышты киләһе йыл “Баҫыу көнө” семинарында күрһәтергә ниәтләй.
Рөстәм Хәмитов республиканың Ауыл хужалығы министрлығына кукуруз үҫтергән агропредприятиеларға дәүләт ярҙамы күрһәтеү алымдарын тикшерергә ҡушты.