Башҡортостан етәксеһе Рөстәм Хәмитов Республика йортонда “Рәсәй капиталы” акционерҙар коммерция банкының идара рәйесе Михаил Кузовлев менән осрашты. Улар “Социнвестбанк”ка ҡағылышлы мәсьәләләрҙе һәм финанс учреждениеһының эшен яйға һалыу буйынса сараларҙы тикшерҙе.

Хәбәр ителеүенсә, Башҡортостан Хөкү­мәте Рәсәй банкына “Социнвестбанк”ты санациялау хаҡында юллама ебәргәйне.
— Банк ауыр хәлгә тарыны. Санация буйын­са эште үҙ иңегеҙгә алғанығыҙ өсөн рәхмәт, — тине Рөстәм Хәмитов. — Тиҙҙән проблемалар хәл ителер, кешеләр зыян күрмәҫ тип ышанам.
Михаил Кузовлев әйтеүенсә, әле учреждениеның клиенттарына һәм вкладсыларына хәүеф янамай. Банктың бындай хәлгә төшөүенә кредит сәйәсәте сәбәпсе тигән фекерҙә ул.
— Банк аҡсаны башлыса халыҡтан йәлеп иткән, иҫәп-хисап операцияларын тормошҡа ашырған, ләкин предприятиеларҙы ла, айырым кешеләрҙе лә кредитлау менән әүҙем шөғөлләнмәгән. Банк-ара баҙарҙа ҙур эш алып барылған. Ҡыҙғанысҡа ҡаршы, был да ярайһы уҡ хәүефле ғәмәл, — тине Михаил Кузовлев.
“Рәсәй капиталы”ның идара рәйесе бил­дә­лә­үенсә, Башҡортостан предприятиелары һәм ойошмалары менән тығыҙыраҡ эшләү “Со­цинвестбанк”ты үҫтерергә мөмкинлек бирәсәк.