800 йыллыҡ бай тарихҡа эйә Юлдыбай ауылының ғорурлығы, даны — ул 80-се лицей. Республикабыҙҙың башланғыс һөнәри белем биреү системаһында иң өлкән һәм абруйлы уҡыу йорттарының береһе былтыр үҙенең 80 йыллыҡ юбилейын билдәләне.

1934 йылда барлыҡҡа килгән белем усағы ошо дәүерҙә Көньяҡ Урал төбәге өсөн 46 мең­дән ашыу йәш белгес әҙерләп сығарҙы, ауыл хужалығын, техниканы белгән, йә­шел­сәсе­лек­тә, умартасылыҡта оҫта эш иткән хеҙмәт­кәрҙәр, етәкселәр менән тәьмин итеүгә ҙур өлөш индерҙе. Был уҡыу йортон тамам­ла­ған Риза Яхин, Ғилметдин Ҡырым­ғужин, Абдулла Фәйзуллин, Мәҡсүт Заманов, Василий Солонин Социалистик Хеҙмәт Геройы исемен алды. Башҡортостан ғына түгел, Рәсәй кимәлендә танылған шәхестәр ҙә байтаҡ.
Абруйлы уҡыу йортона сифатлы белгестәр әҙерләү өсөн ныҡлы матди-техник база, уңайлы йәшәү шарттары булдырылған. Бөтә етештереү базаһы газға көйләнгән. Өсәр ҡатлы ике ятаҡханала егет һәм ҡыҙҙар өсөн уңайлы социаль-көнкүреш шарттары булдырылған, 100 урынлыҡ ашхана, китапхана, спортзал, ял бүлмәләре эшләй. Бында республиканың Йылайыр, Баймаҡ, Бөрйән, Хәйбулла, Учалы, Белорет райондарынан килеп белем алалар, уларға дөйөм ятаҡтан урын бирелә, ашатыу бушлай.
Лицейҙың директоры – район Советы рәйесе, Башҡортос­тан­дың атҡаҙанған мәғариф хеҙ­мәт­кәре Ғәле Нәҙерғолов. Баш­ҡортостан ауыл хужалығы институтын тамам­лаған Ғәле Яхъя улы төрлө яуаплы вази­фа­ларҙы атҡара, әммә яҙмыш уны ҡа­сандыр атаһы етәкләгән ошо белем усағына килтерә. Тимәк, быуындар күсәгилешлеге дауам итә. Тап ул директор булып килгәс, уҡыу йортонда ыңғай үҙгәрештәр башлана, төҙөк­ләндереүгә ҙур иғтибар бүленә. Тимәк, коллектив етәксенән уңған.
Лицей, Башҡортостандың Мәға­риф министрлығы иғлан иткән инновациялы белем биреү программаһы буйынса конкурста ҡат­нашып, 20 мил­лион һумлыҡ грантҡа лайыҡ булған. Был сумма тулыһынса матди базаны нығытыуға һәм үҙгәртеп ҡороуға тотонолған. Мәҫәлән, заманса ауыл хужалығы техникаһы, ағасты беренсел эшкәртеү комплекслы ҡорамалы, сит ил ағас эшкәртеү станоктары һатып алынған. Былар уҡыу йортона белем биреү хеҙмәттәре исемлеген киңәйтергә, баҙар талап иткән эшсе көстө сифатлыраҡ кимәлдә әҙер­ләргә ярҙам иткән. Матди базаны заманға яраҡлаштырыу уҡыу процесына яңы темалар, йүнәлештәр индерергә мөмкинлек биргән. Мәҫә­лән, сит ил ауыл хужалығы машиналарын хеҙмәтләндереү, ялан шарт­та­рында ауыл хужалығы техни­каһын ремонтлау, йылҡы­сы­лыҡ, со­лоҡсолоҡ...
Былар, берҙән, уҡыу йортонда әҙерләгән белгестәрҙең хеҙмәт ба­ҙа­рында конкурентлығын арттырһа, икен­сенән, уларға шәхси йүнәлештә йәки крәҫтиән (фермер) хужалыҡтары төҙөп, үҙҙәренең мөмкинлектәрен тулыраҡ асырға һәм ҡулланырға ярҙам итә. Уҡыу йорто лабораторияларында, оҫтаханалар­ҙа грант иҫә­бенә алынған заманса ҡорамалдарҙа, шулай уҡ Интернет аша электрон белем биреү сыға­наҡтарына мөрә­жәғәт итеп, үҙаллы шөғөлләнеү ҙә тик файҙаға ғына.
Белем усағы тармаҡтағы алдынғы предприятиелар менән эшлекле бәй­ләнеш бул­дырған. Мәҫәлән, билдәле “Алексеевка” сов­хо­зы, “Урал аръяғы” МТС-ы, “Саллы-Профи” яуаплылығы сикләнгән йәмғиәте – шулар иҫәбен­дә. Улар, үҙҙәренең заманса йыһаз­ландырылған етештереү базаһында хеҙмәт практикаһы үткән йәш ҡыҙҙар менән егеттәргә оҫталыҡты арттырыу мөмкинлеген булдырып, инновациялы белем биреү программаһын тормош­ҡа ашырырға ярҙам итә.
Юғары квалификациялы белгес­тәр туплан­ған коллективта 80-дән ашыу кеше эшләй. Улар һәр студентты үҙ балаһылай күреп, белем серҙәре менән уртаҡлаша, йәштәргә рух ныҡлығы биреүгә, уларҙы донъя ауырлыҡ­тарына ҡаршы тора алыр­ҙай ысын шәхес итеп тәрбиәләүгә ҙур көс һала.
Буласаҡ белгестәр уҡыуҙан тыш ваҡытын бушҡа уҙғармай: үҙешмәкәр түңәрәктәргә йөрөй, спорт менән шөғөлләнә, сәләмәт йәшәү рәүеше алып бара. Йыш ҡына район, республика күләмендә үткәрелгән һөнәри оҫталыҡ конкурстарында, спар­та­киадаларҙа әүҙемлек күрһәтеп, приз­лы урындар яулай, лицей данын яҡлап төрлө фестивалдәрҙә, ярыш­тарҙа ҡатнаша.
Хеҙмәтенә күрә – хөрмәте. Былтыр Юлды­байҙағы 80-се һөнәрселек лицейы, иң яҡшы башланғыс һөнәри белем биреү учреждениеһы тип танылып, Башҡортостан Республикаһы Хөкүмәтенең Дипломы менән бүләк­ләнде. Был да — Ғәле Яхъя улының оҙаҡ йылдар тынғыһыҙ хеҙмәтенең бер емеше. Тап ошо көндәрҙә Йыла­йырҙың арҙаҡлы ир-уҙаманы – гәзи­те­беҙ­ҙең күптәнге дуҫы – күркәм юби­ле­йын билдәләй. Абруйлы етәк­се, өлгөлө ғаилә башлығына 60 йәш тула. Матур ғүмер байрамың мөбәрәк булһын, Ғәле Яхъя улы! “Ал да нур сәс халҡыңа” тип тап һеҙҙең турала әйтелгән төҫлө.