“Берҙәм Рәсәй” һайлауға әҙер08.08.2015
Башҡортостандың Дәүләт Йыйылышы — Ҡоролтай Рәйесе, “Берҙәм Рәсәй” сәйәси партияһының төбәк бүлексәһе секретары Константин Толкачев, журналистар менән осрашып, 13 сентябрҙә үтәсәк һайлауға әҙерлек барышы менән таныштырҙы.
– “Берҙәм Рәсәй” – һәр һайлау кампанияһында иң әүҙем ҡатнашҡан партия. Был алдынғылыҡты бер кемгә лә бирергә теләмәйбеҙ. Әлеге мәлдә республикала һайлауҙа ҡатнашыу хоҡуғына эйә булған 58 партия теркәлгән, шулар араһында иң күп ағзаһы булғаны берәү – “Берҙәм Рәсәй”. Беҙҙең сафта 86 мең кеше тора. Башҡортостанда әлеге депутат корпусындағы туғыҙ мең ағзаның 85 процентын тәшкил итәбеҙ. Һәр береһен урындағы халыҡ бала саҡтан белә тиһәм дә, яңылышмаҫмын. Яңы кандидаттарҙы ла яуаплы мәл көтә, – тине Константин Толкачев.
Урындағы үҙидара депутатлығына кандидаттар тәҡдим итер алдынан партия, ғәҙәттә, праймериз үткәрә. Был юлы эске тауыш биреүҙә 15 меңдән ашыу ағза ҡатнашып, уларҙың яртыһы кандидатлыҡҡа теркәлгән.