Былтыр Әлшәй районының Ҡыҙыл ауылындағы табип амбулаторияһына ябылыу ҡурҡынысы янағайны. Ул йыл аҙағында көндөҙгө стационарға ғына ҡалдырылды. Ҡыҙыл ауылы биләмәһенә ҡараған тирә-яҡ ауылдарҙа йәшәгәндәр ошо хаҡта “Башҡортостан” гәзитенә мөрәжәғәт итте. Редакцияның ярҙамы менән февраль айынан ул яңынан эшләй башланы. Район үҙәгенән 40 — 60 саҡрым алыҫлыҡта урынлашҡан ауылдар өсөн был ваҡиға ҙур шатлыҡҡа әйләнде.Халыҡ исеменән “Башҡортостан” гәзите редакцияһына сикһеҙ ҙур рәхмәтемде белдерәм. Дауахананың баш табибы Зөлфирә Сәхипгәрәева етәкселегендәге коллектив бөгөн дә, нәҡ элекке кеүек, бар күңелен һалып халыҡҡа хеҙмәт итә, сирләп киткән кешеләр, әленән-әле дауаханала ятып, һаулығын нығытып сыға ала. Ошо оло ҡыуаныс түгелме? Халыҡ шатлығы ғүмерлек булһын ине, тип кенә теләргә ҡала.
Клара ТУҠАЕВА,
Үрәҙмәт ауылы старостаһы.