Силәбе өлкәһенең Арғаяш районы 1934 йылға хәтлем Башҡорт АССР-ының Арғаяш кантонына ҡараған, ул Башҡорт Хөкүмәте Рәйесе Әхмәтзәки Вәлидиҙең бойороғо нигеҙендә ойошторолған. Бөгөн төбәктә халыҡтың 70 процентын башҡорттар тәшкил итә.7 августа Арғаяш районы үҙенең 85 йыллыҡ юбилейын үткәрергә йыйына, ойоштороу комитеты төҙөлгән. Йола буйынса, байрам стадионда район ауылдарының парады менән башланасаҡ. Әлбиттә, уңғандар етәкселек тарафынан бүләкләнәсәк. Тантанаға бихисап ҡунаҡ саҡырылған, шул иҫәптән Башҡортостандың Силәбе өлкәһендәге даими вәкиле Амур Хәбибуллиндың килеүе көтөлә.
Ҡайһы байрам йыр-бейеүһеҙ уҙһын? Учалы ҡала филармонияһының “Урал-тау” ансамбле тамашасыларҙы дәртле бейеүҙәре менән һөйөндөрәсәк, бынан тыш, Башҡортостандан йырсы Рөстәм Ғиззәтуллин һәм тағы бер нисә артист саҡырылған. Паркта “Ҡала оҫталары” тигән күргәҙмә эшләйәсәк, башҡорт аш-һыуын ауыҙ итергә мөмкин буласаҡ, балалар өсөн дә программалар ҡаралған.
Мөхәммәт ХӘБИРОВ,
Башҡортостандың Силәбе өлкәһендәге даими вәкиллегенең матбуғат хеҙмәткәре.