Изге Рамаҙан айында уҡыусылар, дин ҡәрҙәштәребеҙгә Зәйнәб Биишева исемендәге “Китап” нәшриәте “Башҡортса дини календарь”ҙың 2016 йылға тәғәйенләнгән яңы баҫмаһын тәҡдим итә. Уның авторҙары — Сәләхетдин Хөсәйен улы Суҡбаев, Ғәлиә Ғәлим ҡыҙы Ғәлимова, Фирҙәүсә Миңнулла ҡыҙы Бикташева менән Әлфиә Йәғәфәр ҡыҙы Илекәева. Был баҫмалағы аят, доға һәм сүрәләрҙең ғәрәпсә яҙылышы, транскрипцияһы, дини даталар Башҡортостан мосолмандарының Диниә назараты рәйесе мөфтөй Нурмөхәммәт хәҙрәт Ниғмәтулла тарафынан әҙерләнгән.
“Башҡортса дини календарь”ҙа Ислам тәғлимәте, мосолман байрамдары, ай һәм ҡояшҡа бәйле астрономик мәғлүмәттәр, намаҙ уҡыу ваҡыттары бирелгән, мосолман ай иҫәбе күрһәтелгән. Баҫма халҡыбыҙҙы динебеҙҙәге әхлаҡи ҡиммәттәр, иман нигеҙҙәре, йолалар һәм ғөрөф-ғәҙәттәр менән таныштырыу маҡсатында нәшерләнгән.
10 мең дана тираж менән донъя күргән календарҙы нәшриәт магазиндарында һатып алырға мөмкин.