Ҡаҙағстандың Төркөстан ҡалаһындағы Әхмәт Ясауи исемендәге Халыҡ-ара ҡаҙаҡ-төрөк университеты төрки дәүләттәрҙән һәм туғандаш халыҡтарҙан студенттар йыйыу хаҡында белдерҙе.

2015—2016 уҡыу йылына Башҡортостан абитуриенттары өсөн квоталы 10 урын бүленде. Бакалавриат программаһы буйынса уҡыу түләүһеҙ буласаҡ. Республикабыҙға килгән университет профессоры Ергобәк Ҡолбәк ошо турала һөйләне.
Уҡыу йортона инеү өсөн 15 июлгә тиклем университет сайтындағы ғариза формаһын тултырырға һәм тейешле документтарҙы [email protected] электрон почтаһына ебәрергә кәрәк. Сентябрҙә буласаҡ студент­тарға саҡырыу ҡағыҙы киләсәк һәм октябрҙән улар әҙерлек курсында имтиханһыҙ уҡый башлаясаҡ. Йәштәр университетта инглиз, төрөк, ҡаҙаҡ телен өйрәнәсәк. Әҙерлек кур­сын­да белем алыу бер йыл дауам итә. Ки­лә­һе йыл абитуриент сайтта күрһәтелгән 52 йү­нәлештең берәүһенә имтихан тапшыра. Бакалавриат программаһы буйынса университетта дүрт йыл уҡыйҙар.