Дмитриевка ҡасабаһында Башҡортостан генерациялау компанияһы филиалы — Затон ТЭЦ-ы төҙөлә башланы. Ошо ваҡиғаға арналған тантанала республика Башлығы Рөстәм Хәмитов ҡатнашты.

Эшселәр электр станцияһының насос ҡоролмаһына нигеҙ һалды. Ошоноң менән төҙөлөш-монтаж эштәре башланып китте. Башҡортостандың өҫтөнлөклө инвестиция проекттары иҫәбенә ингән объект Өфөнө электр һәм йылылыҡ менән тәьмин итеү мөмкинлеген бирәсәк. Затон ТЭЦ-ы был юҫыҡта ҡытлыҡты кәметәсәк, халыҡҡа, сәнәғәт объекттарына электр бүлеү сифатын яҡшыртасаҡ. Ул сығарған йылылыҡ “Ағиҙел аръяғы” торлаҡ районына йүнәл­теләсәк.
Станциялағы ҡорамалдарҙың күпселеге Рәсәйҙә етештерелгән. Төп яғыулыҡ рәүешендә тәбиғи газ файҙаланыласаҡ. Киләһе йыл аҙағында бөтөн эштәрҙе тамамлау, станцияны эшкә ҡушыу күҙаллана.