Уҡыуҙар тамам, ауыр тойолған имтихандар ҙа артта ҡалды. Быйыл да Йәрмәкәй районында уҡыу алдынғыларына (бөтәһе 14 ҡыҙ һәм егет) миҙал тапшырыу тантанаһы юғары кимәлдә үтте.
– Бөгөн шатлыҡлы ла, моңһоу ҙа кисә. Ҡыуанмаҫлыҡмы ни: һеҙҙең түшегеҙҙе сыңлап торған миҙал биҙәйәсәк, шул уҡ ваҡытта тиҙҙән төрлө яҡҡа таралышасаҡһығыҙ, – тине район хакимиәте башлығы Илшат Райманов. – Мәктәптә үткән йылдар – һеҙҙең өсөн тәүге тормош баҫҡысы ул, киләсәктә иһә тағы ла мөһимерәк һынауҙар көтә.
Илшат Әмир улы белдереүенсә, был уңышҡа өлгәшеүҙә сығарылыш класс уҡыусыларының үҙҙәренең, шулай уҡ ата-әсәләрҙең һәм бигерәк тә педагогтарҙың өлөшө ҙур.


Быйыл Йәрмәкәй, Тарҡаҙы һәм Уҫман-Ташлы урта мәктәптәре уҡыусылары алдынғылыҡты бирмәгән. Мәҫәлән, Әлмир Абдулхаҡов (Йәрмәкәй), тик “бишле” билдәләренә уҡыуҙан тыш, төрлө конкурстарҙа ҡатнашҡан. “Уйна, гармун!” Бөтә Рәсәй бәйгеһендә гран-при яулаған. Тарҡаҙынан Яҙгөл Ноғоманова иһә география фәненән Берҙәм дәүләт имтиханында 100 балл йыйған.
– Тәбиғәтте яратам, киләсәктә геолог булырға теләйем. Ҡазан ҡалаһындағы юғары уҡыу йортона документтарымды тапшырасаҡмын, – тип уй-хыялдары менән уртаҡлашты ҡыҙ. – Апайым Наҙгөл дә мәктәпте миҙалға тамамлағайны, әле Башҡорт дәүләт медицина университетында белем ала. VIII класҡа күскән Айгизәр ҡустым беҙгә эйәреп яҡшы уҡый, ә балалар баҡсаһына йөрөгән Иҙел, президент булам, ти.



Ата-әсәләр исеменән сығыш яһаған Флүзә Шәмсетдинова бил­дәләүенсә, яуаплылыҡ менән тырышлыҡ сифаттары булғанда ғына еңеүҙәр яулана, әлеге үҫмерҙәр өсөн был миҙал – тормоштағы тәүге оло “бишле” билдәһе.
Бүләкләнеүселәр Анастасия Ефимова менән Әлмир Абдулхаҡов ышаныс белдереүселәрҙең йөҙөнә ҡыҙыллыҡ килтермәҫкә һүҙ бирҙе.
Ниндәй байрам йыр-моңһоҙ булһын инде! Ҡурай моңон да ишетте тамашасылар, кинәнеп йыр ҙа тыңланы.