Башҡортостанда “БЕЛЛ Экуипмент Руссланд” предприятиеһының “НефАЗ” асыҡ акционерҙар йәмғиәте менән берлектәге BELL үҙбушатҡысын етештереү буйынса проекты старт алды.

Уны тормошҡа ашырыуҙың тәүге һөҙөм­тәһе “НефАЗ”дың етештереү майҙансығында BELL заводының инженер-иретеп йәбеш­те­реүселәре күҙәтеүе аҫтында тәжрибә өлгө­һөнөң кузовын ҡороу, иретеп йәбештереү һәм монтажлау булды. Әҙерлек барышында – яҙғыһын “НефАЗ” инженерҙары Көньяҡ Африка Республикаһында урынлашҡан төп предприятиеға барып уҡып ҡайтты.
Тауарҙы презентациялау БРИКС-2015 саммитына арнала. “Рәсәйҙә эшләнгән” тамғалы тәүге үҙбушатҡыс яҡын арала “Учалы тау-байыҡтырыу комбинаты”ның бер объектында һынау үтәсәк. Уның һөҙөмтәһе буйынса Нефтекама ҡалаһында техниканы етештереүҙе яйға һалыу тураһында ҡарар ҡабул ителәсәк.
Импортҡа алмаш программаһына ярашлы, был проект BELL үҙбушатҡысын Рәсәй ҡулланыусыһына арзан хаҡҡа һатып алыу мөмкинлеген бирә.