Полиция майоры Руслан Аҙнабаев хаҡында хеҙмәттәштәре, уңған, тырыш, ипле кеше, тиҙәр. Уңыштары хаҡында ҡысҡырып йөрөмәҫ, зарланғанын да ишеткәндәре юҡ. Ҡыҫҡаһы, ул – яуаплы, тынғыһыҙ, эшен еренә еткереп башҡарған ышаныслы ир-егеттәрҙең береһе. Ә маҡсатҡа ынтылыш ғаилә тәрбиәһенән килә.
Егет Өфө юридик институтын тамамлаған, хоҡуҡ һаҡлау өлкәһендә 2000 йылдан бирле эшләй. 2006 йылдан – Күмертау ҡалаһы эске эштәр бүлегенең өлкән оперуполномоченныйы вазифаһында. Тәжрибәле белгес ҡатмарлы һәм ауыр енәйәттәрҙе тикшереүҙә ҡатнаша, енәйәтселәрҙе асыҡлау эшенә етәкселек итә.
Руслан Аҙнабаевты хеҙмәттәштәре ҡыйыу йөрәкле булғаны өсөн хөрмәт итә. Ҡатмарлы хәлдәрҙә албырғап ҡалмайынса, эште теүәл башҡарырға күнеккән.
...Ҡәҙимге эш көнөндә Аҙнабаевҡа тикшереү-оператив төркөмө менән ҡаланың бер фатирына барырға тура килә. Кешеләр унда бер ирҙең күрше ҡатынды законһыҙ рәүештә бикләп тотоуын хәбәр итә. Шул билдәле була: енәйәтсе ҡатындың ишеген емереп ингән, бысаҡ менән ҡурҡытып, көсләгән. Хәл полиция хеҙмәткәрҙәренә билдәле булыуын белгәс, хаяһыҙ әҙәм автомобиль, шулай уҡ ҡатындың берәй туғанын килтереүҙе талап итә. Ғәйепһеҙ кешенең ғүмеренә ҡурҡыныс янағанын иҫәпкә алып, хоҡуҡ һаҡлау хеҙмәткәрҙәре енәйәтсенең талабын үтәргә мәжбүр була... Артабан, Голливуд триллерҙағындағы шикелле, полицейскийҙар енәйәтсе артынан ҡыуа төшкән. Юл буйында ул ҡатынға бер нисә тапҡыр бысаҡ менән сәнскән, ауыр йәрәхәтләгән. Ниһайәт, Көйөргәҙе районының Ира ҡасабаһы эргәһенән йыраҡ түгел урында – Ағиҙел йылғаһы ярында – машинаны туҡтатҡандар. Руслан Аҙнабаев бер ҙә албырғап ҡалмаған, енәйәтсе ултырған машина эргәһенә тиҙ генә йүгереп килеп, табель ҡоралынан һауаға атҡан. Әҙәм аҡтығының иғтибарын бер нисә секундҡа йәлеп итеп, ҡулына бығау ҙа кейҙергән.
Бындай хәлдәр хаҡында тағы әллә күпме бәйән итергә булыр ине. Русланға: “Көн һайын кире күренештәрҙең шаһиты булып, тормош йәмен юғалтыуҙан ҡурҡмайһыңмы?” – тигән һорау бирҙек. “Һәр хәлдә, йәшәйештең матурлығын күреп, тулы ҡанлы тормош менән йәшәргә тырышам”, – тип яуап бирҙе беҙгә майор.
Былтыр Руслан Аҙнабаевтың хеҙмәте лайыҡлы баһаланды – ул Рәсәй Президенты Дмитрий Медведевтың Указы менән “Йәмәғәт тәртибен һаҡлауҙа күрһәткән хеҙмәте өсөн” миҙалы менән бүләкләнде. Ошондай ир-уҙамандар хоҡуҡ һаҡлау ойошмаларының намыҫы, кешеләрҙең имен тормошона ышаныс булып тора ла инде.