Рәсәй Президенты Владимир Путин “Башнефть” акционерҙар нефть компанияһы акцияларының 25 процентын Башҡортостанға тапшырыу тураһындағы Указға ҡул ҡуйҙы.
“Рәсәй Федерацияһы Хөкүмәте менән Башҡортостан Республикаһы Башлығының федераль милектәге “Башнефть” йәмғиә­те­нең 38 128 551 ябай акцияһын һәм 6 280 076 өҫтөнлөклө акцияһын Башҡортостан милкенә тапшырыу тураһындағы тәҡдимен ҡабул итергә”, тиелә документта. Ил Хөкүмәтенә ике ай эсендә акциялар пакетын республи­ка­быҙға тапшырыуҙы тәьмин итеү бурысы йөкмәтелде.
“Башнефть” акцияларын Башҡортостан милкенә тапшырыу – тарихи ғәҙеллекте тергеҙеү һәм яңы финанс мөмкинлектәренә эйә булыу күҙлегенән республикабыҙ өсөн бик мөһим ваҡиға. Төбәк Башлығы Рөстәм Хәмитов журналистар менән әңгәмәлә ошо турала белдерҙе.
– Хәлде аңлағаны һәм үтенесебеҙҙе кире ҡаҡмағаны өсөн ил Президенты Владимир Владимирович Путинға рәхмәтлемен. Был республика өсөн киң мөмкинлектәр аса, – тине ул.
Республика Башлығы әйтеүенсә, баҙарҙа акциялар пакетының хаҡы 90 миллиард һум самаһы тәшкил итә.