Республиканың Торлаҡ-коммуналь хужалыҡ министрлығында уҙған йыл йомғаҡтары буйынса “Күп фатирлы иң яҡшы йорт” конкурсында еңеүселәрҙе бүләкләү тантанаһы үтте. Бәйгегә 21 муниципаль берәмектән 190 йорт буйынса материалдар тәҡдим ителгән. Торлаҡ-коммуналь хужалыҡ министры Сергей Афонин рәйеслегендәге комиссия уларҙың иң яҡшы 50-һен асыҡланы.
Бәйгелә еңеүселәр министрлыҡтың дипломдары һәм 100 мең һум күләмендә премия менән бүләкләнде. Аҡса күп фатирлы йорт­тарҙы һәм улар эргәһендәге биләмәне тәр­типкә килтереүгә тотоноласаҡ.
Әйткәндәй, конкурс төбәк Башлығы Рөстәм Хәмитовтың башланғысына ярашлы йыл һайын үткәрелә. Еңеүселәрҙең исемлеге Торлаҡ-коммуналь хужалыҡ министрлығы сайтында баҫыла.