Башҡортостанда 2014 йылға бюджет килеме буйынса план 100,9 процентҡа үтәлгән. Дәүләт Йыйылышы — Ҡоролтайҙың Бюджет, һалым, инвестиция сәйәсәте һәм территориаль үҫеш комитеты ултырышында республиканың финанс министры Рида Собханҡолова ошо турала хәбәр итте.

Былтыр бюджет үтәлеше санкциялар индерелеүгә, милли валюта девальвация­һына, нефттең арзанайыуына бәйле ҡатмарлы шарттарҙа барҙы. Йыл аҙағында финанс баҙарында булған сетерекле хәл дә эҙһеҙ үтмәне. Быларҙың барыһы ла предприятиеларҙың эш һөҙөмтәләрендә, хеҙмәт хаҡында сағылыш тапты, һөҙөмтә­лә ҡаҙнаға инергә тейеш керем кәмене. Ведомство башлығы әйтеүенсә, ошондай ҡыйынлыҡтарға ҡарамаҫтан, йылды республика ыңғай динамика менән тамамланы. 560,8 миллиард һумлыҡ түләү йыйылды (2013 йыл менән сағыштырғанда 13,5 процентҡа күберәк).
– Һалым һәм уға ҡарамаған килемдәрҙе йәлеп итеү йәһәтенән республика яҡшы эшләне. Хөкүмәт кимәлендә сара күрелде, министрлыҡтар һәм ведомстволар әлегә тиклем иғтибарға алмаған резервтарын асты, — тине комитет рәйесе Рузалия Хисмәтуллина.