3 – 9 июндә Башҡортостанда “Берҙәмлек” Халыҡ-ара милли мәҙәниәттәр фестивале уҙа. Унда, ғәҙәттәгесә, Рәсәй төбәктәренән, сит илдәрҙән ҡунаҡтар ҡатнашасаҡ. Быйыл сара Өфөлә үтәсәк ШОС һәм БРИКС илдәре саммиттарына арнала.

“Берҙәмлек” Өфө, Октябрьский ҡалалары, Бәләбәй, Дәүләкән, Туймазы райондары буйлап уҙасаҡ. Фести­вал­дең гала-концерты 8 июн­дә Өфөләге “Баш­ҡортостан” дәүләт концерт залы ал­дын­дағы майҙанда була. Башта “Мираҫ” фольклор ансамбле сығыш яһаһа, артабан концертты фестивалдә ҡатнашыу­сылар да­уам итәсәк.
“Ватандош” ансамбле Башҡорт­остан һәм Өфө халҡын үзбәк мәҙә­ниәте менән таныштырырға ниәтләй. Коллектив былтыр декабрҙә Түбәнге Нов­город өлкәһендә ойошторолған. Етәк­сеһе – Рәхәт Ниязмәтова.
– Тыуған яғыбыҙҙың йырҙары, бе­йеү­ҙәре менән ватандаштарыбыҙҙың кү­ңелен һуғарырға тырышабыҙ. Мил­ли моңдарҙы яҡташтарыбыҙ көтөп ала, – ти “Ватандош” коллективы ағза­ла­ры. – Төп маҡсатыбыҙ – йәш быуынға хал­ҡыбыҙҙың мәҙәниәтен, йолаларын еткереү. Заманса йырҙар­ға әүрәп, улар боронғо үзбәк йырҙа­рын да онотмаһын ине.