Президент Владимир Путин 2020 йылға 20 миллион квалификациялы эшсе әҙерләү маҡсатын ҡуйҙы. Был сәйәсәткә бәйле, сит илдәр санкция иғлан иткәндә үҙебеҙҙең завод-фабрикаларҙы тергеҙеү, аҙыҡ-түлек етештереүҙе арттырыу маҡсаты ҡуйыла. Һөнәрле һәм эшле булырға теләгән йәштәр лицей, техникумдарҙы һайлай. Улар Рәсәйҙә иң яҡшылар иҫәбендәге Мәләүез механика-технология колледжына барһа – отолмаҫ. Бөгөн бында Себер, Волга буйы, Ырымбур төбәктәренән килеп белем алалар.
“Мәләүез һөт-консерва комбинаты, һөт эшкәртеү заводтары, “Башспирт”, төҙөлөш компаниялары, ит эшкәртеү предприятиеларында эшләргә теләйһегеҙме? Автомобиль йүнәтеү буйынса шәхси эшеңде асырға хыялың бармы? Һөнәрле лә, эшле лә булам тиһәң, туп-тура ошо механика-технология техникумына юллан”, – тип әйтке килә йәштәргә. Бында баҙар иҡтисады талап иткән һөнәрҙәргә уҡыталар. Техникумдың иҡтисад, төҙөлөш, механика, технология бүлектәрендә бөгөн меңдән ашыу студент иҫәпләнә.
Бында уҡыу һәм көнкүреш өсөн уңайлы шарттар бар. Бер нисә корпустан торған техникумда кәрәкле йыһаз, заманса техникалы уҡыу кабинеттары, оҫтахана, ике спорт, шулай уҡ тренажер, тамаша залдары, музей бар. һуңғы йылдарҙа компьютерҙар, спорт йыһаздары, телевизор һәм видеомагнитофондар, башҡа техник кәрәк-яраҡ алынған. Ситтән килеп уҡыусылар өсөн ике ятаҡта (егеттәр һәм ҡыҙҙар өсөн айырым) һәйбәт мөмкинлектәр тыуҙырылған, унда ял, уҡыу бүлмәләре лә бар.Һөнәри белемде нығытыу өсөн төрлө факультативтар, түңәрәктәр ҙә ойошторола. Шулай уҡ ижади яҡтан үҫеш өсөн йыр, бейеү ансамблдәре, театр, ҡурай, гармун һ.б. түңәрәктәр уңышлы эшләй, йәнең теләгәненә барып шөғөллән, һәләтеңде үҫтер.
Техникумда спортҡа ҙур иғтибар бүләләр. Уның 15 төрө буйынса секциялар эшләй. Студенттар йыл һайын ҡала, республика ярыштарында лайыҡлы урындар яулай. Ғөмүмән, механика-технология техникумы үҙ студенттарының һәр яҡлап үҫеше өсөн тырыша. Техникумда белем һәм рухи көс туплаған студенттар оло тормош юлына ныҡлы әҙерлек менән баҫа, үҙ урынын табыуға өлгәшә.
Һәр ерҙә уңыш, ҡаҙаныштар нигеҙен етәксе һала, уның ойоштороу һәләте, кешеләргә мөнәсәбәте коллективтың эшмәкәрлегенә ыңғай йоғонто яһай. Техникум директоры, Рәсәй Федерацияһының почетлы урта һөнәри белем биреү хеҙмәткәре Хәмит Рәшит улы Ҡунаҡҡоловтың (һүрәттә) хеҙмәте баһалап бөткөһөҙ. Уның етәкселегендә коллектив агросәнәғәт тармағы өсөн кадрҙар әҙерләүҙең яңы алымдарын тормошҡа ашыра. Техникумды тамамлаған йәш белгестәр Мәләүез ҡалаһы һәм районында ғына түгел, республика, Рәсәй төбәктәрендә лә эш таба. Мәҫәлән, В. Кирсанова – Белорет һөт заводында цех начальнигы, В. Саглаев – “Мәләүез шәкәр заводы” асыҡ акционерҙар йәмғиәтенең баш инженеры.Техникум, студенттар юғары белем алһын өсөн, Башҡорт дәүләт аграр университеты, Мәскәү дәүләт технология һәм идара итеү университеты менән килешеүҙәр төҙөгән. 2011 йылда урта һөнәри белем биреү буйынса уҡыу йорттары араһында Башҡортостандың иң яҡшы учреждениеһы булараҡ, диплом менән бүләкләнде. Ә инде 2014 йылда мәләүездәрҙең Рәсәйҙең “Иң яҡшы 100 уҡыу йорто” иҫәбенә инеүе техникумдың абруйы юғары булыуы хаҡында һөйләй.