Республика Башлығы Рөстәм Хәмитов Башҡортостан бюджетының һәм муниципаль берәмектәр ҡаҙнаһының килем ҡеүәтен, һалым һәм уға ҡарамаған килемдәр керемен арттырыу мәсьәләһе буйынса ведомство-ара комиссияһының ултырышын үткәрҙе.

– Бөгөн беҙ барлыҡ ки­мәл­дәге бюджеттарға бурыстың артыу проб­ле­маһын тикшерәбеҙ. Апрель башында республика буйынса федераль ҡаҙна системаһына 14,6 миллиард һумлыҡ бурыс йыйылған ине. Шуның яртыһы — 7,7 миллиард һумдан ашыуы — беҙҙең йыйылма бюджетҡа тура килә, – тип хәбәр итте Рөстәм Зәки улы. — Республика ҡаҙнаһына ла бурыс арта. Йыл башынан алып был күрһәткес 22 процентҡа үҫкән. Табышҡа һалым һәм ойошмалар мөлкәтенә һалым буйынса ла түләүҙәрҙең 1,5 тапҡырға артыуы күҙәтелә. 1 апрелгә 25 ҙур ойошманың ғына бюджет алдындағы бурысы ярты миллиард һумдан ашып киткән.
Республика Башлы­ғы тиҙ арала бындай хәлдең сәбәбен асыҡ­лау бурысын ҡуйҙы. Шулай уҡ һалымға ҡа­ра­маған килемдәр буйынса ла бурыстың артыуы билдәләнде. Ошо йәһәттән респуб­ликаның йыйылма ҡаҙнаһы 2,4 миллиард һумдан ашыу аҡсаны алып еткермәгән. Уның 1,1 миллиард һумын юл ҡағиҙәләрен боҙған өсөн түләнмәгән штрафтар тәшкил итә.
Кәңәшмәлә ошо йүнәлештәге эште кө­сәйтеү, рейдтар ойоштороу, бурыслыларҙы тикшереү хаҡында әйтелде.