Мәғлүмәт ваҡытында барып етһен27.05.2015
Башҡортостандың Үҙәк һайлау комиссияһы 13 сентябрҙә үтәсәк муниципаль һайлауҙарға әҙерлекте бөгөндән башланы. Туймазы ҡалаһында “2015 йылдың 13 сентябрендә Башҡортостан Республикаһында муниципаль һайлауға әҙерләнеүҙең һәм уны үткәреүҙең көнүҙәк мәсьәләләре” тигән темаға “түңәрәк өҫтәл”дең уҙғарылыуы – быға асыҡ дәлил. Сараны республиканың Үҙәк һайлау комиссияһы рәйесе Хәйҙәр Вәлиев алып барҙы.
– Башҡортостандың Үҙәк һайлау комиссияһы үҙ эшмәкәрлегендәге мөһим йүнәлештәрҙең береһен тормошҡа ашыра: һайлау кампанияһын лайыҡлы үткәреү – беҙҙең төп бурыс. Шуға бөгөнгөләй осрашыуҙар бик кәрәк. Маҡсатыбыҙ – муниципаль кимәлдәге һайлауға ҡағылышлы көнүҙәк проблемаларҙы асыҡлау, территориаль һайлау комиссияларын формалаштырыу, һайлау системаһының эшен көйләү, – тине Хәйҙәр Арыҫлан улы.
Көн ҡаҙағына сығарылған мәсьәләләр урындағы һайлау комиссияһының эшмәкәрлеген өйрәнеүҙән башланды. Ғөмүмән, Туймазы районында участка комиссиялары яҡшы тәжрибә туплаған. Райондың территориаль һайлау комиссияһы рәйесе Генадий Алчинов уның менән ихлас уртаҡлашты.
Артабан сарала ҡатнашыусылар һайлау кампанияһы барышында мәғлүмәт сығанаҡтарын ҡулланыу мәсьәләһен өйрәнде. Ни тиһәң дә, был һайлау көнөнә туранан-тура тәьҫир иткән факторҙарҙың береһе – халыҡ ваҡытында һәм дөрөҫ хәбәрҙар икән, тимәк, күрһәткестәр ҙә юғары буласаҡ. “Түңәрәк өҫтәл” барышында территориаль һайлау комиссияларының “Һайлауҙар” дәүләт автоматлаштырылған системаһы менән хеҙмәттәшлек даирәһен киңәйтеү зарурлығы ла һыҙыҡ өҫтөнә алынды.