Башҡортостан Башлығы Рөстәм Хәмитов Республика йортонда Белорус дәүләт нефть һәм химия концерны (“Белнефтехим”) рәйесе Игорь Ляшенко менән осрашты.

Концерн етәксеһе Өфөлә уҙғарылған “Ҙур химия” форумына юғары баһа бирҙе.
– Беҙ ҡатнашҡан сара юғары кимәлдә ойошторолған. Күреүебеҙсә, республиканың төп байлығы — кешеләр һәм уларҙың камиллыҡҡа ынтылыуы. Иң оҡшағаны хеҙмәтләндереүсе производстволарҙың һәм проект институттарының тәжрибәһе булды, — тине Игорь Ляшенко.
2014 йыл йомғаҡтары буйынса Башҡортостан менән Белоруссия араһындағы тауар әйләнеше 458,8 миллион доллар, шул иҫәптән экспорт — 329,7 миллион, импорт 129,1 миллион доллар тәшкил иткән. Республикабыҙҙың тышҡы сауҙа әйләнешендә Беларусь етенсе урынды биләй. Башҡортостанда әлеге республика капиталы ҡатнашлығында төҙөлгән 25 предприятие эшләй.