28 апрелдә Башҡортостан Башлығы Рөстәм Хәмитов “Һалым һалыуҙың патент һәм ябайлаштырылған системаларын ҡулланған шәхси эшҡыуарҙар өсөн 0 процент күләмендәге һалым ставкаһын билдәләү тураһында”ғы Башҡортостан Республикаһы Законына ҡул ҡуйҙы. Документ Башҡортостандың Интернет селтәрендәге хоҡуҡи мәғлүмәттәр порталында урынлаштырылған.

Бындай ташлама ғәмәлдә бәләкәй һәм урта эшҡыуарлыҡ вәкилдәренә ҡағыла. 2015—2017 йылдарҙа республикала иҡти­садтың үҫешен һәм социаль тотороҡ­ло­лоҡто тәьмин итеүҙең комплекслы планын тормошҡа ашырыу йәһәтенән йүнселдәргә ярҙам күрһәтеүгә йүнәлтелгән сараларҙың береһе ул. Документ Рәсәйҙең Һалым кодексына индерелгән үҙгәрештәргә ярашлы эшләнгән. Яңыртылған Кодекста ил төбәк­тәренә тәүге тапҡыр теркәлгән һәм етеш­те­реү, социаль, ғилми тармаҡтарҙа эш­ләгән йүнселдәр өсөн ике йыллыҡ һалым “каникулын” ғәмәлгә индереү тураһында ҡарар ҡабул итеү хоҡуғын биреү күҙҙә тотола.
Һалым ташламалары патент систе­ма­һының 23 һәм ябайлаш­тырылған систе­малағы 21 эшмәкәр­лек төрө буйынса эшләгән бәләкәй һәм урта бизнес вәкил­дәренә ҡағыла. Һалым каникулы систе­маһы 2020 йылға тиклем ғәмәлдә ҡала. Республика Законы иһә патент системаһы буйынса эшләгәндәр өсөн — майҙың беренсе декадаһынан, ябайлаштырылған системаны файҙаланыусыларға ҡарата киләһе йылдың 1 ғинуарынан көсөнә инә. “Каникул” — патент ҡулланғандарға ике календарь йыл, ябайлаштырылған система буйынса эшләгәндәргә ике һалым осоронда ғәмәлдә ҡала.
Әйткәндәй, был мәсьәлә 19 мартта Башҡортостан Башлығы Рөстәм Хәмитов­тың эшҡыуарлыҡ вәкилдәре менән осрашыуында ла тикшерелгәйне.
– Беҙ киләсәккә ҡарап эш итергә тейешбеҙ. Беренсенән, йүнселдәр өсөн уңайлы шарттар тыуҙырһаҡ, икенсенән, уларҙың башҡа төбәктәргә китеүенә, ситтә теркәлеүенә юл ҡуймаҫҡа тырышабыҙ, — тине төбәк етәксеһе.