Ун йәшлек Өфө балеринаһы Софья Вәлиуллина “Тылсымлы кескәй туфли” V Бөтөн Рәсәй хореография мәктәптәре һәм бейеү коллективтары фестиваль-конкурсында еңеү яуланы. Сараны Илза Лиепаның “Мәҙәниәт — балаларға” хәйриә фонды Мәскәү халыҡ-ара музыка йортонда ойошторҙо.Софья Вәлиуллина “классик бейеү” номинацияһында “Кескәй муза” бейеүен башҡарҙы. Ҡыҙ Өфөләге “Браво” бейеү театрында шөғөлләнә. Ул – Владимир Спиваков фонды стипендиаты. Уҡытыусыһы – Башҡортостандың атҡаҙанған сәнғәт эшмәкәре Светлана Харисова. Танылған хореограф, Мәскәү дәүләт хореография академияһының художество етәксеһе, СССР-ҙың халыҡ артисы Михаил Лавровский рәйеслегендәге баһалама комиссияһы йәш башҡарыусының оҫталығын юғары баһаланы. Софьяға Андрис Лиепаның эскизы буйынса бронзанан ҡойолған фестиваль статуэткаһы тапшырылды.