Телебеҙҙең байлығы һөйләштәрҙә асыҡ күренә. Респуб­лика­быҙҙың төрлө төбә­гендә ғүмер иткән милләттәштәребеҙ урындағы үҙенсәлектәрҙе һаҡлаһа, рухи хазинабыҙ ярлыланмаҫ, киреһенсә, көс-ҡеүәте артыр ине.

Һөйләштәрҙе өйрәнеү йәһә­тенән диалектология практи­каларының әһәмиәте баһалап бөткөһөҙ. Былтыр беҙ, БДУ-ның башҡорт филологияһы һәм журналистика факультеты студенттары, ошондай ғәмәли сәфәрҙә булдыҡ, тыуған районыбыҙҙағы һөйләш серҙәрен өйрәндек.
Мин тыуған яғымда – Дүртөйлө районында – үҙем өсөн ҡыҙыҡлы асыштар яһаным. Телебеҙ йылдар үтеү менән һис ниндәй үҙгәреш кисермәгән, асылын һаҡлап ҡалған. Диалект һүҙҙәре араһынан бер нисәһен әйтеп үтәйем: түрбаш (аш-һыу урыны), алдыр (ҙур тәрилкә), һыйыҡ май (көнбағыш майы), бутбыл (баҙ), һауһаҡ (һау-сәләмәт кеше) һәм башҡалар.
Районымдың тел үҙен­сәлек­тәрен өйрәнеүҙән киләсәктә лә туҡтап ҡалмаҫмын, тим. Диалектология практикаһы һәр сту­дентҡа шундай этәргес бирәлер.