Республикала ауыл хужалығын үҫтереүгә йүнәлтелгән программаларҙың көйлө эшләүе, дәүләт ярҙамының даими күрһәтелеүе районда фермерлыҡ һәм эшҡыуарлыҡ йүнәлештәрен яңы кимәлгә күтәрә. Йәштәр малсылыҡ, игенселек менән ныҡлап шөғөлләнә, тәжрибә туплай.Шундайҙарҙың береһе, Илфат Сәфәрғәлин, Һаҡмар ауылында йәшәй. Әле 30 йәше лә тулмаған фермер аяғында ныҡлы баҫып тора, хатта ауылдың тотҡаһына әүерелгән.
Илфат Шәфҡәт улы бәләкәйҙән атаһынан хеҙмәт тәрбиәһе алып, әсәһе Зифа Рәхимйән ҡыҙының балаларға белем биреүенә һоҡланып үҫә. Һаҡмар урта мәктәбен тамамлағас, БДУ-ның Сибай институтындағы физик культура һәм спорт бүлегенә уҡырға инә, әрме сафында хеҙмәт итеп ҡайта. Диплом алғандан һуң эш таба алмай йөрөй ҙә, яҙмышын ҡырҡа үҙгәртеп, үҙаллы кәсеп итергә була. Атаһының ярҙамы, әсәһенең фатихаһы менән һыйыр малы һатып ала. Уның был аҙымын ҡатыны Гөлфиә Ирек ҡыҙы ла хуплай һәм йәштәр, тәүәккәлләп, Рәсәй ауыл хужалығы банкынан кредит юллай, йәнә 39 баш һыйыр, өр-яңы “МТЗ” тракторы, бесән сапҡыс һәм йыйғыс һатып ала. Малсылыҡ тармағын үҫтереү буйынса республика программаһында ҡатнашып, еңеү яулағандан һуң, фермер һатып алған малы өсөн дәүләттән тейешле субсидия юллауға өлгәшә, элекке “Һәүәнәк” совхозының буш торған фермаһын ҡуртымға ала.
Бөгөн йәш фермерҙың хужалығында 105 баш һыйыр малы иҫәпләнә, шуның 60-ы – һауын һыйыры. Дүрт ауылдашын эшле иткән, йәй осоронда ваҡытлыса хеҙмәткәрҙәр йәлеп итә Илфат Шәфҡәт улы. Бынан тыш, 100 гектар майҙанда ауыл хужалығы культуралары сәсә, тағы 100 гектар сабынлығы бар.
“2011 – 2015 йылдарҙа крәҫтиән хужалығы базаһында ғаилә һөтсөлөк фермаларын үҫтереү” программаһында ҡатнашып, Сәфәрғәлиндәр 1 миллион 600 мең һумлыҡ грантҡа ла лайыҡ була.
– Мал һанын арттырыу, һөтлө һыйырҙарҙы ишәйтеү, эш урындарын күбәйтеү – төп маҡсат, – ти фермер. – Ауылда башлыса малсылыҡтан ғына табыш алырға мөмкин бит. Яңыраҡ һыйырҙарҙы яһалма ҡасырыу буйынса өҫтәмә белем алдым, бар яҡлап та үҫергә тырышабыҙ.
Әйткәндәй, Һаҡмарҙың уңған фермерының терәге булырҙай Илнур һәм Батыр исемле улдары үҫеп килә.