Ошо көндәрҙә Өфөнө таҙартыу, төҙөкләндереү һәм йәшелләндереү буйынса дөйөм ҡала өмәһендә 69 меңдән ашыу кеше ҡатнашты.

Торлаҡ-файҙаланыу участкалары, предприятиелар һәм ойошмалар хеҙмәт­кәр­ҙәре, урындағы халыҡ, студенттар, уҡыусылар эшкә дәррәү тотондо. Сүп-сар сығарыуға 1 меңдән ашыу автомашина йәлеп ителде. Урам-юлдарҙа — 13 миллион 880 мең, квартал һәм ихаталарҙа — 11 миллион 26 мең, парк, скверҙарҙа 3 миллион 174 мең квадрат метр майҙан таҙартылды. Йәмғеһе 1 550 квадрат метр юл япмаһы төҙөк­ләндерелде. Баш ҡала янындағы сүп-сар полигонына 5 мең кубо­метрҙан ашыу йөк сығарылды.
Өмә айлығы барышында Сергиев зыяратын төҙөкләндереүгә айырым иғтибар бирелә. Әле бында ҡой­ма­ларҙы йүнәтеү, венгр хәрби әсир­ҙәренең ҡәберҙәрен тәртипкә кил­тереү буйынса эш бара.