“Кемделер дөрөҫ юлға әйҙәр өсөн донъя яңғыратҡан лозунгтар күтәреп митингтар ойоштороу түгел, ә һепертке, сепрәк алып уның өйөн йыйыштырыу, йә, мәҫәлән, үҙеңдең тупһаңды йыуғандан һуң уныҡын да таҙалап ҡуйыу – изге ниәтте тормошҡа ашырыу өсөн күркәм аҙымдарҙың береһе булыр” тигән яҙма тәрән мәғәнәгә эйә.Таҙалыҡ – имандың яртыһы. Йәшәйештәрен дин ҡанундарына ярашлы ҡорған һәр әҙәм балаһына күңелен дә, уйҙарын да, йортон да, кейем-әҙәбен дә саф тотоу зарур. Был гүзәл сифаттар Ер йөҙөндәге барса халыҡтарҙың татыу, тыныс ғүмер итеүенә, төплө камиллашыуына ыңғай сәбәп кенә булыр.
Башҡортостан мосолмандарының Диниә назаратындағы Йәштәр бүлеге Урыҫ Православие сиркәүенең Өфө епархияһы менән берлектә ойошторған өмә алда әйтелгәндәрҙе көнкүрештә ҡулланыуҙы асыҡ сағылдыра.
Оҙайлы ҡыш осоронда ҡарҙа йыйылған сүп-сарҙы, кипкән япраҡтарҙы йыйыу баш ҡаланың “Ихлас” мәсете биләмәһендә башҡарылды. Унда төрлө конфессия вәкилдәре, башлыса йәш быуын вәкилдәре ҡатнашты. Ял көнө тип тормай, изге маҡсат менән мәсеттең тирә-яғын таҙаларға килгән һәр кем оло сауапҡа ғына түгел, иң мөһиме, йән тыныслығына, күңел йылыһына өлгәште. Өмәнең һуңында, йола буйынса, барлыҡ уңғандар ҙа сәй табынына йыйылды, үҙенсәлекле, ҡыҙыҡлы әңгәмә ҡорҙо, танышты, аралашты.Сараны ойоштороусыларҙың береһе Тимур Вәлитов әйтеүенсә, бындай күренеш ҙур социаль әһәмиәткә эйә, һәм улар кешеләр араһында үҙ-ара йылы мөнәсәбәт, хеҙмәттәшлек булдырыуға йоғонто яһай. Был йәһәттән планлаштырылған башҡа байтаҡ саралар республика Башлығы ҡарамағындағы Дәүләт-дин мөнәсәбәттәре буйынса советтың “Диндәр аралашыуы һәм милләттәр берҙәмлеге – йәмғиәттәге илһөйәрлек нигеҙе” проектының бер өлөшө булараҡ үткәрелә.