Хәҙерге уҡыусыларға һөнәр һайлау йәһәтенән уңайлы шарттар тыуҙырыла. Мәҫәлән, Интернет ярҙамында хеҙмәт баҙарындағы ихтыяж тураһында даими мәғлүмәт алырға мөмкин. Шулай уҡ белем усаҡтары йыл һайын “Асыҡ ишектәр көнө” үткәреп, үҙ эшмәкәрлеге менән яҡындан таныштыра.

Күптән түгел Стәрлетамаҡ күп профилле һөнәри колледжында ла ошондай сара уҙҙы. “Асыҡ ишек­тәр көнө”нә Стәрлетамаҡ, Салауат, Ишембай ҡалалары, Мәләүез, Ғафури, Ауырғазы, Йылайыр, Ишембай һәм Стәр­ле­тамаҡ райондарынан 150-нән ашыу уҡыусы килде. Улар колледж хаҡында видеоролик ҡа­раны, унан белем усағы буйлап сәйәхәт ҡылып, уҡыу йортоноң мөмкинлектәре, шарттар менән танышты.
Осрашыуҙа уҡыусылар үҙҙәре өсөн бай мәғлүмәт тупланы. Кемделер хоҡуҡ өлкәһе ҡыҙыҡһын­дырһа, икенселәр өҫтәмә белем биреү педагогы, социаль хеҙмәт­кәр булырға теләй, дизайн, ин­фор­матика, реклама йүнә­леш­тә­ре буйынса китергә теләгәндәр ҙә бар. Ғөмүмән, был колледжда йәмғиәткә кәрәкле һөнәрҙәргә өйрәтәләр. Студенттар диплом алғас та хәстәрлектән ситләтел­мәй: уларҙы эшкә, юға­ры уҡыу йортона урынлаштырыу йәһәте­нән ярҙам ҡаралған. Ябай һө­нәр­ҙәргә ҡытлыҡ кисерелгән мәлдә, әлбиттә, бындай уҡыу йортта­рының ишектәре һәр саҡ асыҡ, бүлмәләре тулы булыуы шарттыр.