Башҡорт дәүләт университеты һәм республика Хөкүмәте ҡарамағындағы “Башҡортостан халыҡтары телдәре тураһында” Законды тормошҡа ашырыу буйынса терминологик хеҙмәт “Башҡорт телендә төбәк диктанты” акцияһын ойошторҙо.

Тәүге тапҡыр уҙғарылған сарала Өфөлә 100-ҙән ашыу кеше ҡатнашты, Бөрө, Сибай, Стәрлетамаҡ һәм Нефтекама ҡалаларында ла онлайн режимында туған телде белеү кимәлен тикшереп ҡаранылар. Студент­тарҙан һәм уҡыусыларҙан тыш, акцияға яҙыусылар, журналистар, уҡытыусылар ҡушылды.
Бөйөк Еңеүҙең 70 йыллығы айҡанлы диктант Яныбай Хамматовтың “Башҡорттар китте һуғышҡа...” романынан өҙөк ни­геҙендә төҙөлдө. Тексты Рәсәйҙең һәм Баш­ҡортостандың халыҡ артисы, Салауат Юлаев исемендәге дәүләт премияһы лауреаты, М. Ғафури исемендәге Башҡорт дәүләт академия драма театры актеры Хөрмәтулла Үтәшев уҡыны.
Университет уҡытыусыларынан торған эксперт комис­сияһы тиҙҙән эштәрҙе тикшерәсәк. Һөҙөмтәләрҙе диктанттан һуң биш эш көнө үткәс проекттың regdict.bashedu.ru сайтында белергә мөмкин.