Районда “Берҙәм Рәсәй” партияһы проектына ярашлы төҙөлгән “Йәшлек” физкультура-һауыҡтырыу комплексы эшләй башланы.

Спорт үҙәген асыу тантанаһында Иҫке Балтас ауылы, район халҡы ҡатнашты. Ваҡиғаны ысын мәғәнәһендә көтөп алдылар. Район спортсылары республика, Рәсәй һәм донъя күләмендәге ярыштарҙа еңеүсе, призер булып тора. Хәҙер заманса уңайлы шарттарҙа буласаҡ чемпиондар әҙерләү өсөн өҫтәмә мөмкинлек тыуҙы.
Комплекс заман талаптарына яуап бирә. Ҙур бассейн, тренажер, фитнес залдары бар. Бәләкәй футбол, баскетбол, волейбол, өҫтәл теннисы секциялары эшләй. Медицина пункты, кейем алмаштырыу бүлмәләре, душ кабиналары, һуттар бары урынлаштырылған.
– Балтас йәштәре спорт комплексын асыуҙы көтөп алды. Хәҙер тренажер залында әүҙем шөғөлләнергә, футбол уйнарға мөмкинлек бар. Бассейнға айырыуса ҡыуандыҡ, — тине Иҫке Балтас ауылында йәшәгән Илшат Миңләхмәтов.
Урындағы халыҡ башҡарылған эш сифатын юғары баһаланы. Йәштәр тренажер залындағы ҡорамалдарҙы һынап та ҡараны. Спорт залында волейбол буйынса тәүге ярыш үткәрелде. Бассейнда йөҙөүселәр ҙә ҡәнәғәт ҡалды.