Башҡортостандың Дәүләт Йыйылышы – Ҡоролтай йортонда коммерцияға ҡарамаған ойошмаларҙың II Граждандар форумы башланды. Уны икенсе йыл рәттән республиканың Йәмәғәт палатаһы, Хеҙмәт һәм халыҡты социаль яҡлау министрлығы, Өфө ҡалаһын үҫтереү йәмәғәт фонды ойоштора. Сарала төбәк Башлығы Рөстәм Хәмитов та ҡатнашты.Әлеге майҙансыҡта коммерцияға ҡарамаған ойошмаларҙың гражданлыҡ йәмғиәтен нығытыу, муниципаль берәмектәрҙе социаль-иҡтисади үҫтереү буйынса эшмәкәрлек йүнәлештәре өйрәнелә. Сарала ҡатнашыусылар пленар ултырыштарҙа, секцияға бүленгән күнекмәләрҙә, тематик майҙансыҡтарҙа фекер алыша. Яңғыраған тәҡдимдәр буйынса артабан эш башланасаҡ.
Форумға Рәсәйҙең һәм Волга буйы федераль округы төбәктәренең Йәмәғәт палатаһы вәкилдәре саҡырылған. Улар үҙҙәренең эш тәжрибәһе менән уртаҡлаша.
Форум барышында республика Хөкүмәте ҡарамағында эшҡыуарҙарҙы борсоған мәсьәләләрҙе хәл итеү һәм административ кәртәләрҙе емереү буйынса оператив штаб булдырыу тураһында тәҡдим булды.