Әҙәбиәт йылы уңайынан Фатима Мостафина исемендәге 20-се Өфө ҡала башҡорт гимназияһына уҡыусыларҙың теләге буйынса шағирә, Ш. Бабич исемендәге дәүләт йәштәр премияһы лауреаты Лариса Абдуллина һәм М. Аҡмулла исемендәге БДПУ доценты, әҙәби тәнҡитсе Зәки Әлибаев саҡырылғайны. Был ике әҙиптең дә балалары беҙҙең гимназияла белем ала.


Байрам дәртле моң, шатлыҡлы йырҙар менән башланып китте. Лариса Хашим ҡыҙы балалар өсөн яҙылған “Балҡантау эйәһе” повесы хаҡында һөйләне. Артабан ул һәр беребеҙҙең күңел­ен елкендерер, йөрәктәргә барып етер шиғыр­ҙа­рын уҡыны. Бигерәк тә тарихи шәхестәргә ар­нал­ғандары һәр бе­ре­беҙҙе тетрән­дерҙе. Ә әҙәбиәт белгесе Зәки Әли­баев хәҙерге баш­ҡорт әҙә­биә­тенең аҫыл үр­нәк­тәре, яҡ­шы әҫәр­ҙәр хаҡында мәғ­лү­мәттәр бирҙе. Ул М. Аҡмулла исемендәге Башҡорт дәү­ләт педагогия университеты студенттары менән бергә килгәйне. Әлиә Әб­дрә­шитованың дәртле бе­йеүҙәре, Динар Мансуровтың үҙе ижад иткән моңло йырҙары һәр кемдең күңелен арбаны.
Әҙәбиәт йылының гимназия­ла­ғы тәүге сараһында уҡ быйылға уй-ниәттәр асыҡланды. Мәктә­бе­беҙҙә милли әҙәбиәтебеҙҙең ма­тур үр­нәк­тәрен өйрәнеп, китап ме­нән дуҫ булып йәшәү – тәү маҡсат. Быны һәр гимназист яҡшы аңлай. Кү­бе­рәк китап уҡыу, әҙәби һәм мәҙәни сараларҙа ҡатнашыу – беҙҙең йыллыҡ йөкләмәбеҙ.