Сабир, Ләйсән, Азамат, Самат, Алмас — береһенән-береһе матур, аҡыллы сабыйҙар — ғаилә тарихтары әле саҡ ике тиҫтә йылға яҡынайған Гөлназ менән Зинур Абыҙгилдиндарҙың байлығы, шатлығы. Ишембай ҡалаһының ишле, күркәм ғаиләләренең береһе улар. Мөхәббәтле йөрәктәре, тырыш холоҡтары менән башҡаларға үрнәк булып йәшәйҙәр.


— Бер-береңде аңлауҙан, тормош мәшәҡәттәрен бергә хәстәрләүҙән күп нәмә тора. Тыныс күңел менән иртән эшкә китәм, кис өйгә ҡайтам. Беләм: балаларҙың күңеле бөтөн, донъя тәртиптә, сөнки уларҙы мәктәптән, балалар баҡсаһынан әсәйҙәре көтөп тора. Гөлназ эшкә сығырға теләһә, бер ҡаршылығым да юҡ, әммә ул ғаилә өсөн әсәйҙең өйҙә булыуы күпкә яҡшыраҡ икәнен аңлай, — ти ғаилә башлығы.
Бының менән килешмәй булмай. Уҡыуҙа, спортта, йыр-бейеүҙә уңыштары менән шат­ландырған балаларға әсәй йылыһынан, атай терә­генән ҡәҙерлерәк ни бар! Гөлназ декрет ялына тиклем ҡала судында эшләй, Зинур — консалтинг фирмаһы етәк­сеһе, халыҡҡа төрлө хоҡуҡи хеҙмәт күрһәтә. Өлкәндәре Сабир ҙа атаһы­ның уң ҡулы булмаҡсы – БДУ-ның Стәр­летамаҡ филиалында юрист һөнәрен үҙләш­терә. Ләйсән менән Азамат ҡаланың Зәки Вәлиди исемендәге 2-се республика башҡорт гимназия-интернатында белем ала, ә бәләкәстәр “Ҡауҙы” балалар баҡсаһына йөрөй.
— Балалар күбәйгән һайын өй нурлыраҡ, бәхетебеҙ тулы­раҡ тойола. Бишәү түгел, ике сабый үҫтереүҙе ауырға алған атай-әсәйҙәрҙе аңла­майым. Киреһенсә, балалар — үҙҙәре беҙгә ҙур таяныс. Ауылда атайҙарына нисек ярҙамла­шыуҙарын күрһәгеҙ! – тип ҡыуанысын белдерә Гөлназ.
Күптән түгел район хаки­миәте тарафынан ойошто­ролған Атайҙар советына ла Зинур Зинфир улы тәүгеләр­ҙән булып саҡырылған — йәмғиәттә лә ғаилә, атай-әсәй абруйын үҫтереү өсөн тап Абыҙгилдиндар кеүектәр күбе­рәк кәрәк шул.
2013 йылда иһә уларға рес­публиканың күп балалы ғаи­лә­ләргә дәүләт ярҙамы програм­маһы сиктәрендә торлаҡ сертификаты тапшырылды. Быйыл, ниһайәт, ремонт эштәренән һуң үҙ йорт­тарына сығырға ниәт­ләйҙәр. Бына шунда инде тормоштары тағы ла күркәмерәк буласаҡ!