Башҡортостан делегацияһы Ҡаҙағстандың Аҡмулла өлкәһендәге Ҡабанбай батыр мавзолейында булды.

Республикабыҙҙың Ҡаҙағстандағы вәкиле бурыстарын башҡарыусы Ренарт Яуынбаев менән Силәбе өлкәһенән тыуған яҡты өйрә­неүсе Рөстәм Сәғиҙул­лин­ды ошо ергә яҡын урынлашҡан Ҡыҙылъяр ауылы мәктәбе хеҙмәткәрҙәре оҙатып йөрөнө. Улар Ҡабанбай батырҙың биографияһы, мәктәптә уға арнап уҙға­рыл­ған саралар хаҡында һөйләне. Балалар тарихи мате­ри­алдар йыйыу менән шөғөлләнә, батырҙың биог­ра­фияһын сәхнәләштереп тамашалар ҡуя икән.
– Атай-олатайҙарыбыҙҙың данлы үткәне ха­ҡында тарихи иҫтәлекте ҡәҙерләп һаҡлау йә­һәтенән ойош­торолған саралар ихтирамға ла­йыҡ. Башҡорт һәм ҡаҙаҡ батырҙары йәм­ғиәттә лә, яу яланында ла оҡшаш бурыстарҙы башҡарған. Шуға күрә тикшеренеүҙәр ҙә халыҡ­тарыбыҙ араһындағы мәҙәни хеҙмәттәшлекте нығытыуға булышлыҡ итер, — тине Ренарт Яуынбаев.
Рөстәм Сәғиҙуллин Ҡаҙағстан уҡыусыла­рына Баш­ҡортостанда һәм Силәбе өлкәһендә батырҙар хаҡын­дағы иҫтәлекте һаҡлау буйынса ойошторолған саралар тураһында һөйләне. Мәҫәлән, күптән түгел Нуриман районында Төлкөсура батыр Алдағоловҡа арналған рә­сем­ конкурсы уҙғарылды. Башҡортостан де­лега­цияһы мәктәп китапханаһына башҡорттар тарихы тураһындағы материалдар, китаптар һәм республика флагын бүләк итте.