VI Ҡышҡы халыҡ-ара балалар уйындарының эмблемаһы һәм талисманының иң яҡшы проекты конкурсына йомғаҡ яһалды. Башҡортостандың Йәштәр сәйәсәте һәм спорт министрлығынан хәбәр итеүҙәренсә, комиссия 28 ҡатнашыусының эшен ҡараған.
Стәрлетамаҡ, Күмертау ҡалаларынан, Өфө, Мәсетле, Бөрө, Күгәрсен райондарынан килгән эштәрҙән тыш, Владивостоктан һәм Ханты-Манси автономиялы округынан да материалдар ебәрелгән.
Ҡыҙыу фекер алышҡандан һуң Башҡортостан Республикаһының атҡаҙанған рәссамы Айрат Тереғолов менән “Симай” студияһы етәксеһе Рим Забаров еңеүсе тип табылған. Улар тәҡдим иткән эмблеманың уртаһында ҡурай сәскәһе менән йондоҙ, талисманда йылмайып торған һоро айыу төшөрөлгән.
Жюри рәйесе, республиканың йәштәр сәйәсәте һәм спорт министры урынбаҫары Вячеслав Чернов әйтеүенсә, еңеүселәрҙең эшендә үҙенсәлеклелек, аныҡ деталдәр һәм сағыу төҫтәр өҫтөнлөк итә.