Алдан хәбәр итеүебеҙсә, гәзит ойошторған рухи эстафета ейәнсураларҙан Йылайыр районы башҡорттары ҡоролтайына тапшырылғайны. Акция урында дәррәү күтәреп алынды, төбәктә милли матбуғатҡа яҙылыу эше башланды.
Район башҡорттары ҡоролтайы рәйесе Ильяс Таҡалов әйтеүенсә, “Башҡортостан” гәзитенә киләһе ярты йыллыҡҡа тәүгеләрҙән булып йәмәғәт ойошмаһының 13 ағзаһы яҙылып та ҡуйған. Уларҙы райондың “Йылайыр уттары” гәзите хеҙмәткәрҙәре лә күтәреп алған.
Шуныһы ҡыуаныслы: акциянан райондағы белем усаҡтары ла ситтә ҡалмай. Эш район хакимиәтендәге мәғариф идаралығының милли телдәр буйынса методисы Альбина Өмөтбаева етәкселегендә уңышлы дауам итә. Кисә Йылайыр районы башҡорттары ҡоролтайы рәйесе Ильяс Таҡалов эстафетаны күршеләренә – Баймаҡ районы башҡорттары ҡоролтайы рәйесе Ғәлимйән Баймурзинға тапшырҙы. Рухи сылбыр өҙөлмәй дауам итә.