1 ғинуарҙан “Рәсәй Федерацияһында граждандарҙы социаль хеҙмәтләндереүҙең нигеҙҙәре тураһында”ғы Закон үҙ көсөнә инде. Ул Башҡортостанда нисек тормошҡа ашырыла? Республика Хөкүмәтендә ошоға арналған кәңәшмәне Рәсәйҙең Федерация Советындағы Мәғариф, фән һәм мәҙәниәт буйынса комитет рәйесенең беренсе урынбаҫары Лилиә Ғүмәрова алып барҙы.
– Социаль хеҙмәтләндереү өлкәһе оҙаҡ йылдар үҙгәртеп ҡороуға мохтаж булды, уны көйләгән закондар иҫкергәйне, – тине Лилиә Ғүмәрова. – Яңы ҡанун граждан­дар­ҙың барлыҡ хоҡуҡтарын һаҡлап ҡына ҡал­ма­ны, ә уларҙың мөмкинлеген дә арттырҙы.
Яңы законға ярашлы, хеҙмәт күрһәте­лә­сәк һәр кемгә айырым программа эшлә­нер­гә тейеш, унда кешенең ниндәй шарттарҙа йәшәүе, ниндәй ярҙамға мохтажлығы иҫәп­кә алына. Күрһәтелгән хеҙмәттең сифатын баһалауға йәмәғәтселек ойошмалары һәм белгестәр йәлеп ителәсәк.